Заңғар Нұрланұлы жасөспірімдер арасында әлемдегі үздік 25 теннисшінің қатарына кірді

АСТАНА. KAZINFORM — Халықаралық теннис федерациясы (ITF) жасөспірімдер арасында жаңартылған рейтингіні жариялады.

Биыл жасөспірімдер арасында АҚШ ашық чемпионатында азулы қарсыластарын ұтып, алғаш рет жартылай финалға дейін жеткен Заңғар Нұрланұлы рейтингіде жоғарылады.

Заңғар осыған дейін 54-орында тұрса, енді бірден 29 сатыға көтеріліп, әлемдегі үздік 25 теннисшінің қатарына енді. 

Тағы бір қазақстандық Әмір Омарханов 28-орнын сақтаса, Дамир Жалғасбай ТОП-50-ге жақындап келеді. Ол қазір 65-сатыға жайғасты.

Сондай-ақ Даниэль Тазабеков 122-орында тұр. 

Еске сала кетейік, бұдан бұрын Жібек Құламбаеваның Қытайдағы челленджер жарысына жолдама алғанын жазған едік. 

Жібек бұл турнирде алғашқы айналымда әлемнің 132-інші, осы доданың 2-ракеткасы, тайбэйлік Джоанна Гарландқа тап келіп, 4:6, 1:6 есебімен жол берді.
Бәсеке 1 сағат 40 минутқа созылды.