Заңсыз кәсіпкерлікпен айналысқан ақтөбелік мемлекетке 650 млн теңгеден астам залал келтірген
АҚТӨБЕ. ҚазАқпарат - Ақтөбе қаласының тұрғыны мемлекетке 650 млн теңгеден астам сомаға залал келтірген, деп хабарлайды ҚазАқпарат Қаржы мониторингі агенттігінің баспасөз қызметіне сілтеме жасап.
Агенттіктің Ақтөбе облысы бойынша Экономикалық тергеу департаменті қызметкерлері 2017 - 2019 жылдар аралығында Ақтөбе облысы аумағына тауарларды жеткізу қызметтерін іс жүзінде жүргізбей жалған шот-фактураларды заңсыз жазумен айналысқан азаматшаның іс-әрекетін әшкереледі.
«Ақтөбе қаласының тұрғыны 2017 жылы 9 фирма құрып, өз атына ЖШС ретінде тіркегені, ҚҚС төлеуші ретінде есепке қою арқылы заңды тұлғаны тіркеу рәсімінен өткені және екінші деңгейлі банктерде банктік шоттар ашқаны, ЖШС арқылы ақша қаражатын қолма-қол ақшаға айналдыратын контрагенттерді іздегені анықталды. Заңсыз кәсіпкерлік қызметтерінен мемлекетке келтірілген залалдың көлемі 650 млн астам теңгені құрады», делінген хабарламада.
Ақтөбе қаласының №2 сотының үкімімен, аталмыш азаматша Қылимыстық кодекстің 216-бабы 3-бөлгімен қылмыстық құқық бұзушылық жасағаны үшін кінәлі деп танылып, 3 жыл 6 ай мерзімге бас бостандығынан айыру және 10 жыл ішінде коммерциялық ұйымдарда басқарушы лауазымдарда жұмыс істеу құқығынан айыру жазасы тағайындалды.
