Іздеуде жүрген Ақтау әкімінің бұрынғы орынбасары Өзбекстанда ұсталды

АСТАНА. KAZINFORM – Мемлекетаралық іздеуде жүрген Тимур Сәдуақасов соттан жасырынбақ болған кезде ұсталды.

Қаржылық мониторинг агенттігі хабарлағандай, Тимур Сәдуақасов мемлекеттік шекараны заңсыз кесіп өту кезінде Өзбекстан Республикасының шекара қызметі тарапынан ұсталды. Оған қатысты Өзбекстан Республикасына заңсыз кіру фактісі бойынша қылмыстық іс қозғалды.

Бар мәліметке сәйкес, Сәдуақасов Т.Х. тергеу изоляторына қамауға алынған. Қазіргі уақытта оны Өзбекстан Республикасынан экстрадициялау мәселесі бойынша Бас прокуратурамен бірлесіп тиісті материалдар дайындалып жатыр.

Еске сала кетейік, Сәдуақасов Т.Х.-ға алаяқтық және аса ірі көлемде пара беруге итермелеу бойынша айып тағылған.

2023 жылы шілде айында Сәдуақасов Т.Х. және «Обуховское» кен орнында заңсыз пайдалы қазбалар өндіру ісіне қатысты адвокат – Курманбаев С.Н. лауазымды тұлғалар арасындағы байланыстарын пайдалана отырып, Долгалев В.И-қа кәсіптегі серіктестеріне қарсы қылмыстық іс қозғауды ұсынған.

Алдын ала келісім бойынша параның бірінші бөлігі ретінде 90 млн теңге алған Сәдуақасов пен Кұрманбаев бұл қаражатты өздері иемденіп, уәде етілген міндеттемелерін орындамаған.

Қылмыстық іс Павлодар облысының мамандандырылған ауданаралық қылмыстық істер жөніндегі сотына қайта қарауға жолданды.

Ақтау әкімінің бұрынғы орынбасарына іздеу жарияланғанын жазған болатынбыз.