Зеленский Вашингтонға аттанды

АСТАНА. KAZINFORM – Украина президенті Владимир Зеленский Дональд Трамппен кездесуге Вашингтонға ұшты. Бұл туралы Украина Жоғарғы Радасының депутаты Ярослав Железняк Telegram-арнасында хабарлады.

Еуропа елдерінің басшылары да Зеленскийді қолдау үшін АҚШ астанасына баратынын мәлімдеді. Еурокомиссия төрайымы Урсула фон дер Ляйен де Вашингтонға баруға ниет білдірді.

– Президент Зеленскийдің өтініші бойынша мен ертең Ақ үйде президент Трамппен және басқа да еуропалық көшбасшылармен өтетін кездесуге қосыламын, – деп жазды фон дер Ляйен әлеуметтік желідегі парақшасында.

This afternoon, I will welcome @ZelenskyyUa in Brussels.

Together, we will participate in the Coalition of Willing VTC.

At the request of President Zelenskyy, I will join the meeting with President Trump and other European leaders in the White House tomorrow.

— Ursula von der Leyen (@vonderleyen) August 17, 2025

17 тамызда Брюссельде Украина президенті Владимир Зеленский мен Еурокомиссия басшысы Урсула фон дер Ляйеннің екіжақты кездесуі өтті. Одан кейін олар «ниеттілер коалициясы» отырысына бейнебайланыс арқылы қатысты.

Зеленский бұл жиынды «өте пайдалы» деп бағалады.

– Барлығы да негізгі мәселелер Украина, АҚШ және Ресей басшысының қатысуымен үшжақты форматта шешілуі тиіс деген пікірді қолдап отыр, – деді ол.

Бұған дейін Зеленскийдің 18 тамызда Вашингтонда Дональд Трамппен кездесуі өткізетіні хабарланған болатын.