Зейнетақы жинағын мерзімінен бұрын алуға тыйым салынбайды – министрлік

АСТАНА. KAZINFORM – Қазақстандықтарға зейнетақы қорында жиналған қаржыны шешіп алуға тыйым салу жоспары жоқ. Бұл туралы Еңбек және халықты әлеуметтік қорғау бірінші вице-министрі Ақмәди Сарбасов мәлім етті.

– Зейнетақы жинақтарын мерзімінен бұрын алу механизмі бірнеше жыл бұрын Мемлекет басшысының тапсырмасымен енгізілді және қазір күшінде. Бүгінде ол екі бағытты қамтиды – тұрғын үй жағдайын жақсарту және емделу үшін пайдалану. Зейнетақы жинақтарының негізгі мақсаты – қартайған шақта табысты алмастыратын тиісті коэффициентпен қамтамасыз ету. Сондықтан бірыңғай жинақтаушы зейнетақы қорындағы (БЖЗҚ) қаражатты тиімді инвестициялау және ынтымақты әрі базалық зейнетақы төлемдерінің тиімділігін арттыруға бағытталған параметрлік өзгерістер енгізу шаралары қабылданып жатыр, – деді Ақмәди Сарбасов Мәжіліс қабырғасында БАҚ өкілдерінің сауалына жауап бере тұрып.

Сондай-ақ вице-министр бұған дейін туындаған қаражатты мақсатты пайдалану, емдеуге жұмсалатын шығындар мәселелерімен Денсаулық сақтау министрлігі айналысып жатқанын айтты.

– Бұл бағыттағы жұмыс жалғасуда, алайда белгіленген параметрлер аясында ешқандай шектеулер енгізу жоспарда жоқ, – деп түсіндірді министрдің орынбасары.

Еске сала кетсек, былтыр елімізде зейнетақы жинағын ерте шешіп алу тоқтатылуы мүмкіндігі туралы айтылған еді.

Сондай-ақ былтыр Ұлттық банк зейнетақы жинағын алу талаптарын күшейтуді ұсынды.