«Зейнетақы жинағын мерзімінен бұрын беру керек пе?» - баспасөзге шолу

АСТАНА. ҚазАқпарат - «ҚазАқпарат» халықаралық ақпараттық агенттігі 28 маусым, сейсенбі күні жарық көрген республикалық бұқаралық ақпарат құралдарындағы өзекті мақалаларға шолуды ұсынады.

***

«Басқасын қайдам, дәл бүгінде Бурабайда жанайқайға басатын тұс келіп тұр. Нақтылай түссек, көп салалы Орман шаруашылығы ғылы­ми-өндірістік орталығының (Қазақ орман шаруашылығы ғылыми-зерттеу институты) ден­дро­бағына (түр мен тек қоры) қатысты мүшкіл хал осы­ны айтқызады. Төтесінен қайырайық, Қазақстан­да орман тым аз. Оның үстіне, жасыл белдеу қоры­ның құрамын негізінен қайың, қарағай, емен, үйеңкімен шектей аламыз. Өсімдіктер әлемінің 17 пайызы ғана ағаш екен. Оның өзі, көбінесе табиғаттың береген қолы­мен бой түзеуде. Сондықтан, "қара орманның" қалыңдауы адамның қамқор жанашырлығына тәуелді болып қала беретіні ақиқат. Міндет - барды еселеп, сұранысқа қажетті тұқым дайындау, жаңа түр мен текті молайту. Бұл орайда, басты тұтынушы бейқам отыр дегеніміз жараспас. Өткен ғасырдың басын­да-ақ, Бурабай орман технику­мын­да дендробау құрылып, өсімдіктер­дің 400 түріне ғылыми сынақ жүргізіле бастаған. Көзайым құнды­лықтың қайтарымы аз болған жоқ. Ең бас­тысы, өсімдіктер әлемін көр­кейту­дің ғылыми жүйесі қалып­тасты»,-деп жазады «Егемен Қазақстан» газеті «Дендробақ демеу күтеді» атты мақаласында.

Ғылыми-зерттеу институты Елбасы тапсырмасын ой­дағы­дай орын­дап отыр. «Жасыл белдеудің» аума­­­ғы қазіргі күні 100 мың гек­­­тарға жуықтады. Онда Бура­бай ғалымдарының жаңа патент­терімен өсірілген бағалы ағаш­тар, саялы өскіндер жай­қа­лып өсіп тұр. Бұл бағыттағы із­деніс әлі де жалғаса беретіні анық. Тек әлеуеті мол ғылыми ор­даға тиіс­ті қамқорлық керек.

Бас басылымда «Автобустар газбен жүреді» деген мақала жарияланды. Ақтөбеде болашақта Еуропа­лық қайта құру және даму бан­кінің (ЕҚДБ) ықпал етуімен сұйытылған газ пайдалана­тын автобустар паркі пайда болады. Облыс әкімі Бердібек Сапарбаев Еуропалық қайта құру және даму банкінің Қазақстандағы өкілі­нің директоры Джанет Хекман­мен болған кездесуінде осындай келісімге қол жеткізді. Өңір басшысы Хекман ханымды қарсы ала отырып, Қазақстан мен ЕҚДБ ынтымақтастығы елдің экономикалық жағдайын дамы­тудағы басым бағыттардың брі екенін атап өтті. Қазақстанда жұмыс істеген 20 жылдан астам уа­қыт аралығында еліміздің түрлі секторында жалпы құны 6,5 миллиард еуро болатын 210 жоба жүзе­ге асырылды.

-  Облыс әкімдігінің Еуразия­лық қайта құру және даму банкімен Ақтөбе қаласының коммуналдық шаруашылығы жүйесін дамыту бойынша екіжақты ынтымақтасып жұмыс атқаруда тәжірибесі бар. Аймақта Еуразиялық банктің қолдауымен бірнеше жоба жүзеге асырылуда. 2015 жылдың қазан айында Ақтөбе қаласының жылу және су жүйелерін жаңғырту және қайта салынуы бойынша жобаны жүзеге асыруға шамамен 7 миллиард теңге инвестиция тартылды, - деді аймақ басшысы.

Ақтөбеде шағын және орта биз­неске қолдау көрсететін ЕҚДБ кеңсесі жұмыс істейді, ол кәсіп­керлерге консультациялық қыз­меттер көрсетеді. Бұл кеңсенің ерек­шелігі Ақтөбе облысымен қатар Атырау, Маңғыстау және Батыс Қазақстан өңірлерінің бизнес өкілдеріне де қолдау көрсетеді. Қа­зіргі таңда аймақта 32 кеңесші жұмыс істейді, олардың көмегімен 105 жоба жүзеге асырылуда.

- Біз сұйытылған газбен қаты­найтын автопарк құру жөнінде бірлескен жаңа жобаны жүзеге асыру үшін шамамен 4,3 миллиард теңге инвестиция салғымыз келіп отыр. Бұл қаражат коммуналдық автобус паркінің инфрақұрылымын дамытуға жұмсалады, табиғи газ пайдаланатын 100 заманауи автобус сатып алады, газ құю стансасы салынады, автобус депосы ашылып, электронды билет жүйесі енгізілмек, - деді аймақ басшысы.

***

«Айқын» газетінің жазуынша, жақында Ұлттық банк төрағасы Данияр Ақышев қазақстандықтар үшін зейнетақы қорындағы жинақтарын мерзімінен бұрын алуға мүмкіндік туатыны жөнінде айтқан болатын. Оның сөзіне сүйенсек, мұндай тәжірибе әлемнің көптеген елдерінде бар. Әзірше бұл мәселе Үкіметтің талқысында. Шешім шықса, Бірыңғай жинақтаушы зейнетақы қоры азаматтардың зейнетақы жинақтарын ауыр сыртқаттарды емдеуге, білім алуға және жылжымайтын мүлік сатып алуға бермек. Бұл тұрғыда БЖЗҚ АҚ басқарма төрағасы Руслан Ерденов өзге елдердің тәжірибесі негізге алынып отырғанын жеткізген. Бұл жайында толық білгіңіз келсе, «Зейнетақы жинағын мерзімінен бұрын беру керек пе?» деген мақаланы оқып шығыңыз.

***

«Журналист және халық! Журналист және қоғам! Бұл бір-бірінен ажырағысыз, біте қайнасқан ұғымдар. Елдің мүддесін, жұртшылық көкейін толғандырған өзек­ті мәселені ортаға салуда алдына жан салмайтын кәсіп иелері бұл журналис­тер екені сөзсіз. Байланыс және ақпарат қызметкерлерінің кәсіби мерекесі қарсаңында осынау кәсіп иелері туралы азды-көпті сөз қозғап отырғанымыздың да мәнісі жоқ емес. Оның бастысы және журна­листерді ұзақ жылдардан бері мазалап келе жатқан негізгі сауалдардың бірі - әлеу­мет­тік тұрғыдан қор­ғалмай келе жатқаны дер едік. Қазір байқап отырсақ, кө­біне-көп қазақ журналистерін шетел­дік әріп­тестерімен салыстыру бай­қалады. Алайда шетелдегідей өз жур­налистерімізге жағдай жасау, олардың мәр­тебесін көтеру және қорғау, материалдық жағынан көтермелеу сияқты игі шараларға көңіл бөлінбей қалатыны өкінішті. Қызмет бабында өміріне қауіп пен қатер төнетін, күн-түн демей материал, мақала дайындайтын журналис­терге тіпті әлеуметтік жеңілдіктер де қа­растырылмай келеді. Атқарған еңбектері алатын жалақыларына да сай келе бер­мейді, күнкөрісінен аспасы анық»,-деп жазады «Ана тілі» басылымы соңғы санындағы «БАҚ өкілдерінің әлеуметтік мәртебесі назардан тыс қалып келеді. Неге?» деген мақаласында.

Осы ретте мақала авторы ең маңызды мәселенің бірі ре­тін­де журналистер күні бүгінге дейін мемлекеттік сала қызмет­керлері қатыса алатын «Тұрғын үй» бағдарламаларына қатысудан құқықтық, заңдық мәртебе тұрғысынан тыс қалып отырғандығын атап өткен. Ал шынтуайтына келгенде мемлекеттік қызметшілерге журналистерге қарағанда анағұрлым жақсы жағдай жасалады.