Зейнолла Ыдырысов гимнастикадан Болгариядағы турнирде күміс жүлдегер атанды

АСТАНА. KAZINFORM – Болгарияның Варна қаласында спорттық гимнастикадан өтіп жатқан кезекті Challenge Cup турнирінде қазақстандық Зейнолла Ыдырысов жүлдегерлер қатарынан көрінді.

Спортты дамыту дирекциясынан мәлім еткеніндей, қазақстандық гимнаст ат снарядындағы жаттығудан күміс жүлдеге қол жеткізді.

Зейнолла Ыдырысов 14.233 ұпай жинады. Одан сәл көбірек ұпай алған вьетнамдық Нгок Хуан (14.266 ұпай) чемпион атанды. 

Өзбекстандық Абдулла Азимов қола жүлдеге ілікті.

Бұдан бұрын наурыз айында Түркияның Анталия қаласындағы әлем кубогы кезеңінде Зейнолла Ыдырысов дәл осы жаттығудан екінші орынға ие болған еді. 

Еске сала кетейік, бұдан бұрын гимнастикадан әлем кубогы кезеңінде Нариман Құрбановтың алтын, Зейнолла Ыдырысовтың күміс алғанын жазған едік.