Жалған хабарлама таратып, сотталғандардың 55%-ы мас болған – статистика
АСТАНА. ҚазАқпарат – Елді дүрліктіріп, «ғимартта бомба бар» деген сияқты жалған хабарлама тарататындар көбіне мұндай әрекетті мас күйінде жасайды. Бұл туралы ІІМ экстремизмге қарсы іс қимыл департаменті 1 басқармасы бастығының орынбасары Алмас Талқанбаев мәлім етті, деп хабарлайды ҚазАқпарат тілшісі.
«Статистикаға сәйкес, жалған хабарлама таратып, сотталғандардың 48-55 пайызы қылмыс жасаған сәтте қатты мас болған. Жалған хабарлама тарататындардың әлеуметтік портретіне келер болсақ, 88%-ы жұмыссыздар, тек 9%-ы ғана жұмыс істейді, ал 1,7%-ы – оқушы. «Әзілқойлардың» орташа жасы – 30-49 аралығында», - деді Алмас Талқанбаев министрлікте өткен баспасөз мәслихатында.
Оның айтуынша, жастардың арасында жалған хабар таратуға құмарлар бар.
«Олардың 85%-ға жуығы мобильді телефон арқылы хабарланған. Ақпараттық технологияның дамуына байланысты интернет арқылы да келіп түскен хабарламалар бар. Ондай факті 8% шамасында. Жалған хабарлама таратушылар адамдар көп жиналатын орындар (сауда орталықтары, базар, дүкен), мемлекеттік органдар мен білім беру мекемелерінің әкімшілік ғимараттары және вокззал мен әуежайды таңдайды», - дейді ол.
Бұған дейін хабарлағанымыздай, өткен аптада елімізде 2,6 мыңнан астам қылмыс жасалған. Оның ішінде 4 кісі өлімі және 3 қасақана денсаулыққа зиян келтіру фактісі тіркелді.
