Жамбы ату: ел қоржынында тағы бір алтын мен қола бар
АСТАНА. KAZINFORM – Жамбы атудан Қазақстанның медальдар қоржыны толыға түсті.
Жамбы атудан отандасымыз Ералхан Айкөз алтын медаль алса, одан бөлек, Айтбек Сарыбай қолаға қол жеткізді. Ал күміс жүлде түркиялық спортшы Егит Керемге бұйырды.
Бүгін жамбы ату түрік стилінде өтіп жатыр. Айта кетсек, жамбы атудан бәсеке «Қазанат» ипподромы маңындағы этно-ауылда өтіп жатыр. Дүбірлі додаға 27 мемлекеттен 78 спортшы қатысуда.
Еске салсақ, спортшыларымыз бұған дейін жамбы атудан әлем және Еуропа чемпионаттарында жүлделі орындарды иемденген.
Бұған дейін аударыспақтан ұлттық құраманың барлық спортшысы финалға шыққаны туралы хабарлаған едік. Финалда ел намысын Есімхан Рахматіллә (90 келі), Сырым Ізбасаров (100 келі) және Біржан Қосалиев (+100 келі) қорғайды.
