Жамбыл облысында су қорының 50 гектар жері мемлекет меншігіне қайтарылды
АСТАНА. KAZINFORM — Су және экологиялық заңнаманы бұзу фактілері бойынша 11 жер қойнауын пайдаланушылары әкімшілік жауаптылыққа тартылды. Бұл туралы Жамбыл облысының прокуратурасының баспасөз қызметі хабарлады.
Негізгі бағыты экологиялық мәдениетті және Бизнестің табиғатқа жауапкершілікпен қарауын қалыптастыру болып табылатын «Таза Қазақстан» Тұжырымдамасын іске асыру шеңберінде прокуратура су заңнамасының сақталуына тексеру жүргізді.
— Аса өзенінде жергілікті атқарушы органдар белгілеген су қорғау белдеулерінің шекараларына қарамастан пайдалы қазбалар өндірілгені анықталды. Бұл әрекеттер өзен арнасын өзгертіп қана қоймай, жақын маңдағы елді мекендерді су басу қаупін тудырды.
Прокурорлық қадағалау актілері мен енгізілген хабарламалардың негізінде жер қойнауын пайдаланушылар мемлекетке су қорының 50 гектарға жуық жерін қайтарды, — делінген хабарламада.
Әкімдік су қорғау аймақтары мен белдеулері режимінің сақталуын бақылауды күшейту, сондай-ақ жағалауды нығайту жұмыстарын ұйымдастыру жөнінде шаралар қабылдап жатыр.
Айта кетелік БҚО-да пайдаланылмай жатқан 468 мың гектар жер мемлекетке қайтарылды.
