Жамбыл облысының ирригация және дренаж жүйелерін реконструкциялау 91%-ға аяқталды

АСТАНА. KAZINFORM – Жамбыл облысының Шу ауданында ирригация және дренаж жүйелерін реконструкциялау жобасы 91%-ға аяқталды. Бұл туралы Су ресурстары және ирригация министрлігі мәлім етті.

Жамбыл облысының ирригация және дренаж жүйелерін реконструкциялау жобасы 91%-ға аяқталды
Фото: Су ресурстары және ирригация министрлігі

Жамбыл облысының Шу ауданында Оң жағалаудағы магистральдық каналдан егіс алқаптарына су беретін ирригация және дренаж жүйелерін реконструкциялау жобасы 91%-ға аяқталды. Нысанды биылдың соңына дейін пайдалануға беру жоспарланып отыр. Жоба Шу ауданының 5 172 гектар егістік алқабына су жеткізуді жақсартуға мүмкіндік береді. Бұған дейін Жамбыл облысында жалпы 10 мың гектар егістік жерді сумен қамтамасыз ететін екі нысан пайдалануға берілген болатын.

— Жоба аясында суару каналдарының құрылысы мен жөндеу жұмыстары жүргізіледі. Бұл өз кезегінде су тасымалдау кезіндегі шығынды азайтып, суды тиімді пайдалануға мүмкіндік береді, — деді Су ресурстары және ирригация вице-министрі Ерболат Ибрайханов.

Еске сала кетейік, бұған дейін қоғамда суды ұтымды пайдалану мәдениетін қалыптастыру мақсатында Су ресурстары және ирригация министрлігі тұрмыстық жағдайда суды үнемдеуге арналған әдістемелік ұсыныстар әзірлегенін жазған едік. 

Соңғы жаңалықтар