Жамбылдың Жаңатас станциясында маневр кезінде локомотивтер соқтығысты

АСТАНА. KAZINFORM — «Қазақстан темір жолы» ҰК» АҚ баспасөз қызметі ️Жамбыл облысы Жаңатас станциясындағы жағдайға қатысты түсініктеме берді.

Оқиғаға қатысты видео әлеуметтік желіде таралды.

— 2026 жылғы 5 наурызда Жамбыл облысындағы Жаңатас станциясында «Жаңатас Су-Жылу» КМК кірме жолына «мазут» тиелген 5 вагонды беруге арналған маневрлік жұмыс жүргізілген кезде Жамбыл локомотив депосының машинисі «КАП Логистик» ЖШС жеке кірме жолындағы локомотивпен соқтығысуға жол берген. Оқиға кезінде ешкім зардап шеккен жоқ, — делінген хабарламада.

Компания мәліметінше, оқиғаның себептері анықталып жатыр. Мән-жайды тексеру үшін арнайы комиссия жолға шықты.

Бұған дейін теміржол торабының екі учаскесінде пойыз бен автокөлік соқтығыса жаздағаны белгілі болды.