Жамбыл облысында электр энергиясының бағасы арзандады

ТАРАЗ. ҚазАқпарат - 1 сәуірден бастап Жамбыл облысында электр энергиясының бағасы арзандайды, деп хабарлайды ҚР Ұлттық экономика министрлігі Табиғи монополияларды реттеу және бәсекелестікті қорғау комитетінің Жамбыл облысы бойынша департаментінен.

«1 сәуірден бастап ГРЭС-1 электр энергиясының жіберу құнының 1 кВт-ына 8,80 теңгеден 8,65 теңгеге арзандауына байланысты электр энергиясының бағасы төмендетіледі, - делінген хабарламада. - Сәйкесінше, біздің департаменттің баға сараптамаларының нәтижесі бойынша «ТОО «ЖамбылЖарықСауда-2030» бөлшек энергиямен қамтамасыз ету қызметтерінің де тарифтері арзандады».

Бұдан бөлек, АҚ «KEGOK» 1 сәуірден бастап электроэнергияға жіберу құнын 1 кВт-ға 1,954 теңгеден 1,943 теңгеге дейін арзандатып отыр. Осыған байланысты, ҚҚС-ны есептемегенде, «Жамбыл электр желілері» ЖШС электроэнергияны тарату және бөлу бойынша қызмет құнын 1 кВт-ға 5,35 теңгеден 5,32 теңгеге дейін арзандатты.