Жамбыл облысында табиғи газ 12%-ға қымбаттады

ТАРАЗ. ҚазАқпарат - Таразда «ҚазТрансГаз Аймақ» АҚ-ның жамбылдық өндірістік филиалының газ бөлу жүйелері бойынша тауарлық газды сатудың шекті бағасының жобасын қарауға қатысты қоғамдық тыңдау өтті, деп хабарлады ҚР ҰЭМ Табиғи монополияларды реттеу және бәсекелестікті қорғау комитетінің Жамбыл облысы бойынша департаментіне сілтеме жасап «ҚазАқпарат» ХАА тілшісі.  

Оны талқылауға тұрғын үй-коммуналдық сектор кәсіпорындарының өкілдері, қалалықтар, қоғам өкілдері қатысты. Жамбылдық газ шаруашылығы басшысы Болат Мұртазаевтың айтуынша, ҚР ҰЭМ Жамбыл облысын қосқанда, бірнеше облыстарда тұтынушылар үшін табиғи газды бөлшек саудада өткізу бағасы 2017 жылғы 1 тамыздан бастап көтерілетінін хабарлады.

«ҚР Энергетика министрлігінің 2017 жылғы 5 мамырдағы бұйрығымен    2017 жылдың 1 шілдесі - 2018 жылғы 30 маусымф аралығы бойынша тауарлық газды көтерме сатудың шекті бағасын бекітті. Жамбыл облысы үшін ҚҚС-сыз газдың бір мың текше метріне баға 21, 197 теңгені құрайды, яғни бұрынғы бағадан 12 пайызға өсті», - деді спикер.

Болат Мұртазаев мұндай үстеме баға бар болғаны пайыздың үлесін құрайтынын, газдың соңғы бағасына әсер етпейтінін айтты. Алайда көтерме сату құнының өсуі табиғи газ бағасының текше метрін шамамен 3 теңгеге өзгертеді.