Жаңа жыл қарсаңында трансплантолог дәрігерлер 9 адамды аман алып қалды
Жаңа жыл қарсаңында дәрігерлер тұрғындарға шұғыл медициналық көмек көрсетті, деп хабарлайды Kazinform.
Денсаулық сақтау министрлігі баспасөз қызметінің мәліметінше, ауа райының қолайсыздығына қарамастан санитариялық авиация күштерінің көмегімен және бірнеше қызметтің үйлесімді жұмысының арқасында бірден 9 пациентке ағза трансплантаттау операциясы жасалды.
Денсаулық сақтау министрлігінің, Ұлттық шұғыл медицинаны үйлестіру орталығының, Ұлттық ғылыми онкология орталығының, Ұлттық ғылыми кардиохирургиялық орталықтың, Республикалық трансплантаттауды үйлестіру орталығының және жоғары технологиялық медициналық қызметің үйлесімді іс-қимылы Жаңа жыл қарсаңында бірқатар операцияны сәтті жүргізуге мүмкіндік берді. Алматы қаласының Сызғанов атындағы Ұлттық хирургия ғылыми орталығында бауыр трансплантаттау, Астана қаласының Ұлттық ғылыми кардиохирургиялық орталығында жүрек және өкпе алмастыру, ал Астана қаласының Ана мен бала ұлттық ғылыми орталығында-екі балаға бүйрек ауыстыру отасы жүргізілді.
Барлық операция сәтті өтті, пациенттердің денсаулығы қанағаттанарлық. Дәрігерлердің айтуынша, екі донор Өскемен және Павлодар қалаларынан келген. Олардың көмегімен ағза трансплантаттауды ұзақ уақыт күткен 9 пациент құтқарылды.
«Ағзаларды транспланттау жөніндегі іс-шараларға қатысқан Павлодар және Өскемен қалаларының денсаулық сақтау ұйымдарының барлық медицина қызметкеріне, ЖПҚ қызметтеріне, сондай-ақ «ҚТЖ» ҰК» АҚ және Павлодар қаласы әуежайының басшыларына күрделі метеожағдайларда трансплантолог дәрігерлер бригадаларының жүріп-тұруына көрсеткен қолдауы үшін алғыс білдіреміз», - делінген хабарламада.
Ағзаны қысқа мерзімде трансплантаттау бойынша виртуоздық жұмысты трансплантолог хирургтар орындады.
