Жаңаөзен: қазақстандық блогерлер Маңғыстау облысының әкімімен кездесті
Кездесу барысында аймақ басшысы облыстың болашақтағы даму бағыттары туралы айтып, Жаңаөзен қаласында болған жаппай тәртіпсіздіктерге қатысты өз пікірін жеткізді, деп хабарлайды pm.kz. сайты.
Блогерлермен кездесу барысында Маңғыстау облысының жаңа әкімі Бауыржан Мұхамеджанов Қазақстан Президенті Нұрсұлтан Назарбаевтың Жаңаөзендегі соңғы оқиғаларға қатысты облыс басшылығының алдына қойған міндеттері туралы айтып берді.
«Негізгі міндет - Жаңаөзен қаласы мен Маңғыстау облысының бірқатар елді мекендеріндегі жағдайды тұрақтандыру. Ол жерлерде де жаппай тәртіпсіздіктер байқалған, бұл - бір. Екіншіден - сайлауалды науқанды жүргізу. 15 қаңтар күні сайлау болады. Бұл жерде төтенше жағдай режимі енгізілген. Сайлау туралы заң бойынша үгіт-насихат еркін жүргізіліп, адамдарды жинауға болады. Саяси партиялар сайлаушыларға өз идеяларын жеткізуі керек, ал төтенше жағдай режимінде белгілі бір тыйым салынатын тұстар бар. Бұдан бөлек, шағын және орта кәсіпкерліктің дамуын қолдау, көші-қон саясатын реттеу жұмыстары бар. Біз бір орында тұрған жоқпыз - білімнің сапасын арттыруға талпынамыз», - деп атап өтті Б.Мұхамеджанов.
Блогер Сабина Сәденованың Маңғыстауды дамыту үшін үш маңызды бағытты атап көрсету туралы сұрағына Б.Мұхамеджанов, біріншісі - инвестициялар тарту деп атап өтті.
«Сондай-ақ бизнесті дамытудың перспективалары бар. Портты дамытумен байланысты перспективаны атап өтуге болады», - деді әкім.
"Үшінші - әлеуметтік сала мәселелері. Бұл жаңа жұмыс орындарын дамыту. Мұндай жағдайлар неге болып отыр? Өйткені бос жұмыс күші бар. Жаңаөзендегі проблема бүгінде ғана пайда болып отырған жоқ. 2020 жылға дейінгі ұзақмерзімді бағдарлама жасалған, онда инфрақұрылымдарды жетілдіру, мектептер, денсаулық сақтау мекемелерін салу, өндірісті дамыту көзделген. Кезінде Жаңаөзен вахталық кент болды. Қазір 110 мыңнан астам халқы бар үлкен қалаға айналды», - деп атап көрсетті Б.Мұхамеджанов.