Жаңаөзенде жарылыс болған үйдің жағдайы бағаланады
ЖАҢАӨЗЕН.ҚазАқпарат – Жаңаөзенде болған жарылыстан үйіндіні шығару жұмысы жүріп жатыр. Содан кейін ғана апат болған үйдің жағдайы бағаланады. Бұл туралы қалалық тұрғын үй-коммуналдық шаруашылығы бөлімінен мәлім етті, деп хабарлайды ҚазАқпарат тілшісі.
«Үй 1977 жылы салынған. 12 пәтерлі үйдің бір кіреберісі орталықтандырылған газбен қамтылған. Апаттық жағдайдағы тұрғын үй тізімінде тұрған жоқ. Үйдің жалпы ауданы - 621 шаршы метр. Қазір үйінділерді сұрыптап, тексеріп жатырмыз, одан кейін сараптама жасалып, тұрғын үйді қалпына келтіруге бола ма, жоқ па - соны анықтаймыз», - деп қалалық тұрғын үй-коммуналдық шаруашылық бөлімінің мамандары.
Жарылыстан зардап шеккен жақын маңдағы үйлерге жергілікті кәсіпорындар көмектеспек.
Бұл мәселе де комиссияның жұмыс отырысынан кейін анықталады.
Айта кетсек, бүгін таңертең Жаңаөзен қаласының 2-мөлтекауданындағы 2 қабатты үйде жарылыс болып, 13 адам зардап шеккен еді.
Зардап шеккендердің бірі жедел жәрдеммен Маңғыстау облыстық көпсалалы ауруханасына жеткізілген болатын.
Оқиғаға орай қылмыстық іс қозғалып, барлығы 4 адам қаза тапқанын жазған едік.
