Жәнібек Әлімханұлы кезекті қарсыласымен көз арбасты

АСТАНА. KAZINFORM - Орта салмақта WBO және IBF нұсқасы бойынша әлем чемпионы, қазақстандық кәсіпқой боксшы Жәнібек Әлімханұлы (16-0, 11КО) кезекті жекпе-жегі алдында баспасөз конференциясын өткізді. 

Баспасөз конференциясы Астанадағы Rixsos қонақүйінде өтті. Оған франциялық қарсыласы Анауэль Нгамиссенгуе (14-0, 9КО) және бокс кеші андеркартында шаршы алаңға шығатын қазақстандық боксшылар Балауса Мұздыман, ағайынды Сабырхандар, Батыр Жүкембаев, Сұлтан Зауырбек қатысты.

Баспасөз конференциясы барысында Жәнібек журналистер сұрағына жауап беріп, алдағы айқасында жанкүйерлер үшін есте қаларлықтай шоу көрсетуге уәде берді. Соңында Жәнібек Әлімханұлы қарсыласы Анауэль Нгамиссенгуемен алғаш рет бетпе-бет келіп, көз арбасты.

Еске сала кетсек, Жәнібек Әлімханұлы 5 сәуір күні Астана қаласында кезекті жекпе-жегін өткізіп, чемпиондық белдіктерін қорғайды.

Осыған дейін хабарлағанымыздай, Жәнібек-Анауэль айқасы андеркарды толық анықталды.

Кеше боксшылар елордадағы Ханшатыр сауда орталығында жанкүйерлер үшін ашық жаттығу өткізген еді.