Үндістанда қоймада болған жарылыстан 20-дан астам адам қаза тапты

АСТАНА. KAZINFORM — Гуджарат штатының Банасканта ауданындағы Диса қаласының шетіндегі отшашу қоймасында болған жарылыс салдарынан кем дегенде 21 адам қаза тапты, оның ішінде 7-еуі бала, деп хабарлайды The Indian Express. 

Оқиға сейсенбі күні жергілікті уақыт бойынша таңғы сағат 9:30 шамасында болған. 

— Жарылыстан ғимарат құлаған. Онда алдын ала мәлімет бойынша отшашулар заңсыз сақталған және сатылған, - деп хабарлады жергілікті полиция өкілдері. 

Сол күні қойма иелеріне адам өлтірді деген айып тағылды. Іс материалдарына сәйкес, олар өрт сөндіру құралдарын орнатпай, ірі көлемдегі пиротехникалық заттарды заңсыз сақтаған. 

— Қаза болғандардың 19-ының кім екені анықталды, - деп хабарлады шенеуніктер.

Полиция құрбандар санының артуы мүмкін екенін айтты. 

Еске сала кетейік, бұған дейін Малайзияда газ құбырындағы жарылыстан 112 адам зардап шеккенін жазған едік.