Жапонияның Осака қаласында жасөспірімдер арасында жанжал туындап, бір бала мерт болды
АСТАНА. KAZINFORM - Жапонияның батысындағы Осака қаласының орталығында сенбі күні кешке пышақпен жасалған шабуыл салдарынан 17 жастағы жасөспірім мерт болып, тағы екі бозбала жарақат алды.
Бұл туралы жергілікті бұқаралық ақпарат құралдары хабарлады.
Kyodo News агенттігінің мәліметінше, жергілікті полицияға түнгі сағат 23:55 шамасында қаланың ең адам көп жиналатын сауда аймақтарының бірі — Дотомбори ауданындағы ғимараттың бірінші қабатында пышақпен шабуыл жасалғаны туралы жедел хабарлама түскен.
Оқиға орны қала орталығында, тамақтану орындары шоғырланған аумақта орналасқан. Шабуыл жасады деген күдікке ілінген жас жігіт қашып үлгерген және әзірге бостандықта жүр.
Полицияның мәліметінше, мерт болған жасөспірім Нара префектурасының тұрғыны. Ол кеуде тұсынан және денесінің өзге бөліктерінен пышақ жарақатын алып, оқиға орнында көз жұмған. Тағы екі 17 жастағы жасөспірім ауруханаға жеткізілген.
Құқық қорғау органдарының дерегінше, шабуыл жасаған адамның жасы шамамен жиырманың үстінде болған және ол үш жәбірленушіні таныған. Қанды оқиғаға дейін олардың арасында жанжал шыққаны да белгілі болды.
Осыған дейін Гамбургте пышақпен қаруланған әйелдің 12 адамды жарақаттағаны туралы жаздық.
