Жас мамандарға мүмкіндік: цифрлық жобалау сұранысқа ие бағытқа айналып отыр
АСТАНА. KAZINFORM — Бүгінде республиканың құрылыс саласы белсенді цифрландыру кезеңіне қадам басып келеді. Тұрғын үй, көлік және өндірістік инфрақұрылым құрылысының жоғары қарқыны жағдайында табыстың негізгі факторлары жобалаудың жылдамдығы мен дәлдігі. Бұл міндеттерді шешу ғимараттарды ақпараттық модельдеу (BIM) технологияларын енгізумен байланысты.
BIM егжей-тегжейлілігі жоғары құрылыс объектілерінің цифрлық модельдерін құруға мүмкіндік береді, бұл тәуекелдерді азайтуға, мерзімдерді оңтайландыруға және жобаларды іске асыру сапасын арттыруға ықпал етеді. Қазақстан жалпы әлемдік үрдістерді ұстанады: қазірдің өзінде BIM-технологияларды енгізу тұжырымдамасы қабылданды, сондай-ақ саланың BIM-ге көшуін реттейтін базалық нормативтік құжат әзірленді.
— Еліміздің ең ірі қалаларындағы озық жобалау ұйымдары мен құрылыс компаниялары қазірдің өзінде BIM-ді іс жүзінде қолданып, оң нәтижелер көрсетіп жатыр. Дегенмен, бүгінгі таңда негізгі мәселелердің бірі цифрлық жобалау саласында білімі мен құзыреттілігі бар жаңа білікті мамандардың келуі.
Жас мамандар үшін бұл перспективалы және технологиялық салада мансапты бастаудың бірегей мүмкіндігі. BIM тек инженерлер үшін ғана емес, сонымен қатар IT саласындағы мамандар үшін де құрылысқа есік ашады: BIM-модельер, BIM-үйлестіруші, BIM-менеджер және басқа да мамандықтар сұранысқа ие болып отыр, — делінген хабарламада.
Сонымен қатар, Қазақстанда құрылыстағы процестерді автоматтандыруға бағытталған цифрлық платформалар белсенді дамып келеді. Оған мемлекеттік ақпараттық жүйелер де, жекеменшік сервистер де кіреді. Бұл шешімдер салалық дамудың жаңа драйверіне айналып, жасанды интеллект технологиясы мен деректерді талдауды дамытуға мүмкіндік береді.
Мемлекет басшысының құрылыс саласын цифрландыру мәселелеріне назар аударуы трансформациялаудың маңыздылығын көрсетеді. Бүгінде Қазақстанда құрылыстағы цифрлық өзгерістер үшін қолайлы орта қалыптасуда және бұл мүмкіндіктер терезесі саланың болашағына өз үлесін қосуға дайын мамандардың жаңа толқыны үшін ашық.
Айта кетелік өнеркәсіп пен құрылыс саласында қандай жаңа мамандықтар пайда болғаны туралы жазған едік.
