Жасанды интеллект әсерінен қандай мамандықтар жойылып кетуі мүмкін — сарапшылар пікірі
АЛМАТЫ. KAZINFORM — Алматыда жасанды интеллект саласындағы AlmatyFair.ai көрмесі өз жұмысын бастады. Көрме 30 наурызға дейін жалғасады.
Көрмеде компаниялар жасанды интеллектке қатысты инновациялық жобалары мен заманауи шешімдерін ұсынатын стартаптар аллеясы бой көтерді. Іс-шара барысында AI саласының мамандары мен сарапшылар жасанды интеллектінің дамуы әсерінен қандай мамандықтар жойылып кетуі мүмкін екенін айтты.
АҚШ пен Ұлыбританияның құқық қорғау және барлау қызметтері қолданатын Black Ice AI жобасының негізін қалаушысы Элисар Нұрмағамбетов ЖИ көптеген салада орташа мамандарды басып озғанын айтты.
— Иә, қазірдің өзінде орташа деңгейдегі программист, маркетолог, заңгерлерге қарағанда AI жұмысты жақсырақ істеп жатыр. Сондықтан бұл салаларда жаппай автоматтандыруға көшу болуы мүмкін. Сонымен қатар болашақта ірі компаниялар программистердің санын көбейткенше AI арқылы өте тиімді жұмыс істейтін шағын топтар құрады деп ойлаймын. Ал Jasper AI бүгінгі күні маркетологтың жұмысының 50 пайызын автоматтандыра алады. Сондықтан бұл барлық салаларға әсер етіп жатыр, — деді Элисар Нұрмағамбетов.
Алматы қаласы Жастар саясаты басқармасының басшысы Азиз Қажданбек қазір Call-орталықтың операторы, копирайтер, монтаж жасаушы сынды мамандықтарға сұраныс азайып жатқанын атап өтті.
Бұл мәселеге байланысты «Қазақтелеком» АҚ Цифрлық бизнес дивизионының бас директоры Абылайхан Оспанов та пікір білдірді.
— Адамдардың жұмыс күшін жасанды интеллект алмастырып жатқан басты жұмыстардың бірі — байланыс орталықтары. Қазір адамдар байланыс орталықтарына хабарласып, оларға жауап беріп тұрған тірі адам не жасанды интеллект екенін ажырата алмайды. Одан кейін мониторинг жүргізетін мамандарды айта аламыз. Мысалы, бізде желілердің жұмысын, ақауларын бақылайтын адамдардың жұмысы автоматтандырылған. Бұрынғыдай 10-15 адам емес, қазір датчиктерді бақылайтын 1-2 маман ғана отырады, — деді ол.
Сондай-ақ Абылайхан Оспанов сату менеджері мен аудармашы мамандықтарды алдағы уақытта жойылуы мүмкін екенін атап өтті. Айтуынша, қазірдің өзінде олардың жұмысын да жасанды интеллект тиімді орындай алады.
Ал nFactorial мектебінің негізін қалаушы әрі директоры Арман Сүлейменов көптеген мамандық жойылмаса да, біраз өзгеріске түсетінін түсіндірді.
— Технологияның дамуымен кей мамандық жойылып, оның орнына басқа мамандықтар пайда болып жатады. Ал кей жұмыс түрі өзгере отырып өзін сақтап қалды. Мысалы, жазушылар қазір де бар. Олар бұрынғыдай жазу машинасымен емес, компьютермен жұмыс істейді. Смартфондардың тарауымен бәріміз фотографқа айналдық, бірақ кәсіби фотографтардың жұмысы тоқтап қалған жоқ. Жасанды интеллект дамуымен бәрі басқаша болады дейін десек болашақты болжай алмаймыз. Сондықтан қазір біздің тарапымыздан AI-ді шетке ысырып қою — қателік болады, — деді Арман Сүлейменов.
Еске салайық, бұған дейін Жаслан Мәдиев жасанды интеллект Қазақстандағы жұмыс орындарын қаншалықты азайтуы мүмкін екенін айтқан болатын.
