Жасанды интеллект: білім беру жүйесін қайта бағдарлау қажет болады

АСТАНА. KAZINFORM — Жасанды интеллект әсер ететін салаларда біраз қызметкерді қайта оқыту керек болады. Бұл туралы Мәжіліс депутаты Екатерина Смышляева мәлім етті.

— Бәсекелес нарықтан бірқатар мамандық жойылса, олардың орнына жасанды инллект құратын жаңа кәсіптер келетінін түсініп отырмыз. Алайда, осы жаңа жұмыс орындарына мүлдем жаңа құзыреттер мен машықтар талап етіледі. Дүниежүзілік экономикалық форумның халықаралық зерттеулеріне қарағанда, осы трансформация болатын салаларда 2030 жылға дейін қызметкерлердің жартысынан астамын қайта оқыту керек, — деді Екатерина Смышляева Парламет Мәжілісінде тілшілер сұрағына жауап бере отырып. 

Оның айтуынша, қазірден бастап білім беру жүйесін қайта бағдарлау маңызды. Сонымен қатар, жасанды интеллект аясында жұмыс берушілер де өздерінің қызметінде тиісті өзгерістер енгізуге мәжбүр болады. 

— Атап айтқанда, құқық қорғау ұйымдарында жұмыс көбейеді. Яғни, еңбек қатынастары саласында адам құқықтарын бұзуға жол бермеу керек болады, — деді депутат.

Бұдан бұрын хабарланғандай, бүгін Парламент Мәжілісінде «Жасанды интеллект туралы» заң жобасы мен ілеспе құжат таныстырылды.