Жастарды жігерлендіру жетістікке жетелейді – Нариман Құрбанов
АСТАНА. KAZINFORM – ҚР Президенті Іс басқармасына қарасты Президенттік орталықта V Дүниежүзілік көшпенділер ойындары аясында «Спорт жастарды әлеуметтік интеграциялау құралы ретінде: көшпенділер мәдениетінен сабақ» атты халықаралық конференция өтті.
Іс-шараның өтуіне Президенттік орталықпен қатар ЮНЕСКО-ның Алматыдағы Өңірлік кеңсесі басшылығы мұрындық болғанын атап өткен жөн. Сонымен қатар, ЮНЕСКО клубтарының Қазақстандық ұлттық федерациясы, ҚР ҰОК және БҰҰ Әйелдер ұйымының қолдауымен ұйымдастырылды.
Конференция барысында «Чемпионның танымы: спорт арқылы жаңа ұрпаққа шабыт» атты арнайы сессия өтіп, танымал спортшылар жиналған жастарға ақыл-кеңесін берді. Олардың қатарында 2012 жылғы Олимпиада чемпиондары Серік Сәпиев, Ольга Рыпакова және Биылғы Париж Олимпиадасының күміс жүлдегері Нариман Құрбанов болды.
«Мен негізі ауырып жатыр едім. Жеке шаруалар да аз емес-тін. Бірақ, «жастармен кездесу ұйымдастырылады» деп шақырған соң бәрін тастап арнайы келдім. Себебі, жеңісті жолды жастармен бөлісіп, жігерлендірудің маңызды екенін жақсы түсінемін. Өзім де танымал спортшыларға қарап бой түзедік. Олимпиадада күміс еншілеуімнің бірден-бір себебі де сол шығар. Сондықтан да, жастармен кездесу ұйымдастырылса міндетті түрде баруға тырысамын», - деді Нариман Құрбанов.
Пленарлық отырыс барысында қатысушылар спорттың тұрақты дамуға, қоғамдық келісімді нығайтуға және инклюзивті қоғам құруға қалай ықпал ететінін талқылады. Бұл диалог спорт арқылы жастарды тәрбиелеуге барлық мүдделі тараптардың өзара тығыз әрекеттесуіне ықпал етеді деп күтілуде.
Халықаралық конференцияның қорытындысы бойынша Қазақстанда әлеуметтік интеграция және тұрақты даму құралы ретінде спортты одан әрі дамыту және қолдау бойынша ұсынымдар әзірленбек.
