Жауырыны жерге тимеген бурабайлық балуан тағы да Ақмола облысының барысы атанды (ФОТО)

КӨКШЕТАУ. ҚазАқпарат - Көкшетауда қазақша күрестен «Ақмола облысы барысы» турнирінің жеңімпазы анықталды.

Облыс орталығындағы Тәуелсіздік алаңында өткен сайыста 38 спортшы балуанның алтын белбеуін сарапқа салды. Ең ауыр салмақ саналатын түйе балуан күресінде осыған дейін облыс көлемінде бірде бір рет «жауырыны жер иіскемеген» бурабайлық Нұрлан Жамалов жеңімпаз атанып, 180 мың теңгенің сертификатын қанжығасына байлады.

Облыстың әр өңірінен жиналған кілең мықты 38 балуанның ішінде бағы мен бабы қатар шапқан Нұрлан енді Астана қаласында өтетін «Қазақстан Барысы» турнирінде Ақмола облысының намысын қорғайтын болады. Сонымен қатар, Көкшетау қаласының намысын қорғап, 2-ші орын алған Әсет Жүнісов те «Қазақстан Барысы» турниріне қатысатын болды.

Еске сала кетсек, бурабайлық Нұрлан Жамалов осымен 5-ші мәрте «Ақмола облысы барысы» атанып отыр.