Жайық өзенінде су деңгейі Индер ауданында да 8 метрден асты

су қоймасы
Фото: Су ресурстары министрлігі

АТЫРАУ. KAZINFORM — Атырау облысындағы Индер ауданында да Жайық өзенінің деңгейі 8 метрден асып кетті.

Атырау облыстық жедел штабтың мәліметінше, бүгін, 3 мамырда кешкі сағат 20:00–де Жайық өзеніндегі су деңгейі тағы да көтерілді. 

«Бүгін кешкі сағат 20:00–де Индер ауданының орталығы — Индербор кентінің тұсында Жайық өзенінің деңгейі 8 метр 8 сантиметрге жетті. Таңертеңгі сағат 08:00–ден бері су деңгейі +20 сантиметрге ұлғайды. Бұл ауданда қауіпті деңгей — 8 метр 45 сантиметр», -деп хабарлады облыстық жедел штабтан. 

Ал, Махамбет ауданында өзен арнасының суы сағат 20:00–де 8 метр 20 сантиметрді көрсетіп тұр.

Таңертеңнен бері су деңгейіне +8 сантиметр қосылған.

Батыр атындағы ауданда 8 метр 50 сантиметр қауіпті шек саналып отыр. 

Қазір қауіпті деңгейге дейін 30 сантиметр қалып тұр. 

Мұнайлы өңір орталығы — Атырау қаласында Жайықтың суы +5 сантиметрге көбейіп, сағат 20:00–де 4 метр 76 сантиметрді құрады.

Шаһар аумағындағы қауіпті шек 5 метр 50 сантиметр деңгейінде белгіленген. 

Еске сала кетелік, бүгін Индер ауданында Жайық бір тәулікте 38 сантиметрге көтерілгенін жазған едік.

Кейін Атыраудағы Махамбет ауданының жедел штабы күшейтілген жұмыс режиміне көшті. 

Соңғы жаңалықтар
telegram