Жайық өзені бойымен тарихи-мәдени, экологиялық экспедиция өтеді
Бұл туралы бүгін апталық брифинг барысында партияның ресми өкілі Оксана Петерс мәлім етті, деп хабарлайды ҚазАқпарат.
Экспедиция құрамына эколог-ғалымдар, археологтар, тарихшылар, билік өкілдері, журналистер мен студенттер кіреді.
Шараның басты мақсаты - Жайық өзені бассейнінің экожүйесін, бай тарихи-мәдени мұрасын сақтауға қоғам назарын аудару.
«Табиғи ресурстарды тиімді пайдаланып, қоршаған ортаны қорғауға бағытталған экология саласында бірыңғай мемлекеттік саясат құрып, кезең-кезеңімен жүзеге асыру - «Нұр Отан» ХДП Халықтық платформасының басым бағыттарының бірі», дейді ресми өкіл.
Экспедицияға қатысушылардың үндеуі бойынша, шара алдында түрлі ғылыми-тәжірибелік конференциялар, «дөңгелек үстелдер» өткізіліп, онда Қазақстан Республикасы мен Ресей Федерациясының үкіметтері мен Парламенттеріне Жайық өзеніндегі кешенді проблемаларды шешу жөнінде арнайы ұсыныстар әзірленген.
Экспедиция жұмысы шілденің 27-сінен тамыздың 2-іне дейін жалғасады.