Жайық өзенінде катерлер соқтығысынан жарақат алған 6 жасар балаға ота жасалды
Атырау облыстық балалар ауруханасының директоры Нұрғабыл Айтмұхамбетовтің айтуынша, зардап шеккен баланың басына күрделі ота жасалған.
«Баланың басынан жасалған күрделі ота сәтті өтті. Қазір науқастың жағдайы жақсарып келеді. Науқас жансақтау бөлімінен травматология бөлімінің палатасына ауыстырылды», -деп хабарлады Нұрғабыл Айтмұхамбетов.
Еске сала кетелік, бұған дейін Жайық өзенінде екі катер соқтығысып, 9 адам ауруханаға түскенін жазған болатынбыз.
Полиция департаментінің мәліметінше, Жайық өзенінде соқтығысқан қайықтар адамдарды серуендету қызметіне пайдаланылған. Су көлігінің бірінде 10 адам, ал екінші қайықта 25 адам болған.
Оқиға салдарынан зардап шеккендердің арасында 5 ересек адам болған. Ал кәмелетке толмаған 4 бала облыстық балалар ауруханасына түскен. Оның ішінде 6 жасар бала жансақтау бөлімінде жатыр.
Полиция қызметкерлері аталған оқиғаға байланысты ҚР Қылмыстық кодексінің 344-бабы 1-бөлігімен (Темiржол, әуе, теңіз немесе өзен көлiгi жүрісі немесе оларды пайдалану қауiпсiздiгi қағидаларын бұзу) сотқа дейінгі тергеу амалдарын жүргізіп жатыр.
Кейін Атырау облыстық денсаулық сақтау басқармасы басшысының орынбасары Алмагүл Әбілованың айтуынша, зардап шеккендердің жағдайы туралы айтып берді.
«Атырау облыстық ауруханасына медициналық көмек алу үшін 3 науқас жүгінді. Оның 2-еуі амбулаторлы ем қабылдауға үйіне жіберілді. Аурухананың лор бөлімінде 1 адам ем қабылдап жатыр. Ал, облыстық балалар ауруханасына 4 бала жеткізілді. Дәрігерлердің тексеруінен соң 1 бала амбулаторлы ем-дом қабылдау үшін үйіне шығарылды. Аурухананың жансақтау бөліміне түскен 2017 жылғы науқастың жағдайы ауыр күйінде қалып отыр. Ал, 2009, 2007 жылғы жасөспірімдер әр түрлі дене жарақатын алған», -деп хабарлады Алмагүл Әбілова.