Жем өзенімен Жылыой ауданының аумағына келіп жатқан судың ағысы қатты
АТЫРАУ. KAZINFORM – Жем өзенімен Атырау облысындағы Жылыой ауданының аумағына су келе бастады. Судың қатты ағысы өзеннің жағалауындағы топырақты құлатып жатыр.
Жем өзені Жылыой ауданындағы Ақкиізтоғай, Шоқпартоғай, Тұрғызба ауылдары мен Құлсары қаласының маңымен ағып өтеді. Қазір өзеннің аталған аудан аумағына келіп жатқан судың ағысы қатты.
Атырау облысы әкімінің облысы әкімінің орынбасары Қайрат Нұртаевтың айтуынша, бүгін, 27 наурызда Ақкиізтоғай ауылының маңында су деңгейі 2 метр 73 см-ге жеткен. Бір тәулікте өзен арнасы 13 см-ге көтерілген.
– Былтыр Жем өзеніндегі су деңгейі 3 метр 63 см-ге көтерілген еді. Аталған су айдынындағы қауіпті деңгей – 3 метр 40 см. Әзірге өзендегі су қауіпті деңгейге жете қойған жоқ. Бірақ түнгі мезгілде ағыс қатты болады. Сол себептен, Жем өзенінің 6 учаскесінде бақылау орнатылды, - дейді Қайрат Нұртаев.
Әкім орынбасарының айтуынша, күндіз де, түнде де өзен жағалауына бөгет салынып жатыр. Оған төтенше жағдайлар саласынан 100, Қорғаныс министрлігінен 150 адам тартылған.
– Жем өзенінің Жылыой ауданындағы арнасы Ақкиізтоғай ауылдық округінің аумағынан бастау алады. Ал Ақкиізтоғай ауылының тұсында су деңгейі әлі көтеріліп жатыр. Демек, қауіп әлі сейілген жоқ. Сондықтан, Тұрғызба ауылының тұсын тереңдету, Каспий теңізіне баратын арнасын аршылып жатыр, -деді Қайрат Нұртаев.
Ал облыстық құрылыс басқармасының басшысы Нұрберген Құсайыновтың мәліметінше, былтырғы тамыз айында Жем өзені мен Құрсай каналының, Қамыскөл және Соленое көлінің түбін тереңдету, бөгет салу басталған.
– Су айдындарының түбін тереңдету жұмысының бас мердігері ретінде «САП-ИН-ВЭСТ» ЖШС таңдалды. Бұл жұмысты биылғы қарашада аяқтау жоспарланып отыр. Осы кезге дейін Жем өзенінің 50 шақырым арнасы толығымен тереңдетілді. Ал Құрсай каналының 46,1 шақырымын тереңдету көзделді. Қазір оның 80 пайызы орындалды, - деп мәлім етті Нұрберген Құсайынов.
Еске сала кетелік, бұдан бұрын Құлсарыға Атырау мен Маңғыстаудан көмек келгенін жазған едік.
