Жеңгетайлықпен айналысқан ақтөбелік жазадан құтылып кетті

АҚТӨБЕ. KAZINFORM — Қаулы шығарған кезде судья «Қазақстан Республикасы Конституциясының отыз жылдығына байланысты рақымшылық жасау туралы» Заңға сүйенді.

Ақтөбе қаласындағы ойын-сауық орталықтарының бірінде әкімші болып жұмыс істеген сотталушы танысына ер адамға жыныстық қызмет көрсетуді ұсынды. Екі арада делдал болғаны үшін қызметіне 40 000 теңге сұраған.

Бұл іс № 2 Ақтөбе қалалық сотында жабық жағдайда өтті. 36 жастағы сотталушы бұған дейін істі болмаған әрі жоғары білімді. Оған Қылмыстық кодекстің 309-бабы 1-бөлігі, яғни, пайдакүнемдiк мақсатта жеңгетайлық жасағаны үшін айып тағылды. 

— Сотталушы тағылған айыпты толық мойындады, жасаған ісіне өкінетінін айтты. Ол соттан «Қазақстан Республикасы Конституциясының отыз жылдығына байланысты рақымшылық жасау туралы» Заңы аясында қылмыстық жауаптан босатуды сұрады. Мемлекеттік айыптаушы да өтінішті қанағаттандыруға қарсылық білдірмеді. Сот қаулысымен сотталушы қылмыстық жауаптылықтан босатылды, сондай-ақ іс жүргізу тоқтатылды. Бұлтартпау шарасы ретінде қолданылған үйқамақтың күші жойылды. Сот қаулысы заңды күшіне енген жоқ, — деп хабарлады Ақтөбе қаласы № 2 сотының баспасөз қызметі.

Еске салсақ, Ақтөбеде көлікті заңсыз иемденіп, сатпақ болған қылмыстық топ ұсталды. Шығын 50 млн теңгеден асты. Қылмыстық топ мүшелері қазір ұсталып, қамауда отыр.