Жеңіліп көрмеген қазақстандық боксшы WBC, WBA, WBO бұрынғы чемпионымен жұдырықтасады
НҰР-СҰЛТАН. ҚазАқпарат – Қазақстандық боксшы Әбілхайыр Шегалиев (8-0-1, 4 КО) өзінің келесі жекпе-жегін Мәскеуде 16 қыркүйекте өткізеді, деп хабарлайды ҚазАқпарат Sports.kz сайтына сілтеме жасап.
Шегалиевтің қарсыласы осы жылдың ақпан айында қазақстандық Мейірім Нұрсұлтановпен (17-0, 10 КО) жұдырықтасқан танымал ресейлік боксшы Андрей Сироткин (20-2-1, 7 КО) болмақ. Ол айқаста Нұрсұлтанов бесінші раундта мерзімінен бұрын жеңген болатын.
Өз мансабында Сироткин үш бокс ұйымының екінші дәрежелі чемпиондық белбеулерінің, яғни WBC ABC Continental, WBA Inter-Continental, WBA Asia, WBO European титулдарына ие болды. Андрей Сироткин өзінің соңғы жекпе-жегін сәуір айында өткізді. Онда ол Беларусь спортшысы Виктор Мурашкинді (4-3, 3 КО) төрешілердің бірауыздан шешімімен жеңді.
Әбілхайыр Шегалиевке келетін болсақ, қазақстандық спортшы ақпан айында ресейлік Манук Диланянмен (12-9-2, 5 КО) жекпе-жек өткізді. Айқас тең нәтижемен аяқталды.
Фото: sports.kz
