Жеңіл атлетикадан Азия чемпионатында Қазақстан қоржынына алғашқы медаль түсті

ОРАЛ. KAZINFORM – Оңтүстік Кореяның Гуми қаласында жеңіл атлетикадан өтіп жатқан Азия чемпионатында қазақстандық Ясмина Тоқсанбаева қола жүлдегер атанды.

Спортты дамыту дирекциясының баспасөз қызметінен мәлім еткеніндей, Ясмина Тоқсанбаева 20 шақырымға спорттық жүрісте үздік үштікке ілікті. 
Қазақстандық жеңіл атлет өзінің жеке рекордына (1:32.15) қол жеткізді.

Осылайша, жеңіл атлетикадан Азия чемпионатында Қазақстан қоржынына алғашқы жүлде түсті.

Ерлер арасында 20 шақырымға спорттық жүрісте тағы бір қазақстандық Георгий Шейко 7-сатыға тұрақтады.

Оңтүстік Кореядағы жеңіл атлетикадан Азия чемпионаты 27-31 мамыр аралығында өтіп жатыр. Онда Қазақстан намысын 32 спортшы қорғайды.

Еске сала кетейік, бұдан бұрын Оралда өткен дзюдо турнирінде ақтөбелік балуанның автокөлік ұтып алғанын жазған болатынбыз.