Жеті жылда Қазақстанның жалпы ішкі өнімі екі есе өсті - Елбасы

АСТАНА. Тамыздың 27-сі. ҚазАқпарат - Жаңа XXI ғасырдың алғашқы жеті жылы ішінде ғана Қазақстан жалпы ішкі өнімін екі еселей алды. Бұл туралы Қазақстан Республикасы Конституциясының 15 жылдығына арналған «Конституция - мемлекеттің демократиялық дамуының негізі» атты халықаралық ғылыми-тәжірибелік конференцияның ашылуында Елбасы Нұрсұлтан Назарбаев мәлім етті.

Президент, Қазақстанның ТМД елдері арасында алғашқы болып посткеңестік кеңістікте баламасы жоқ салық, зейнеткерлік реформаларын жүзеге асырғанын атап көрсетті. Ұлттық экономикаға 100 миллиард доллардан астам тікелей шетел инвестициясы тартылды.

«Тек жаңа жиырма бірінші ғасырдың жеті жылы ішінде біздің экономикамыз екі еселенді. Бұнымен қоса, соңғы он бес жылда жан басына шаққанда жалпы ішкі өнім жеті жүз доллардан сегіз мың долларға дейін, яғни он бір есе артты», - деп мәлім етті Н.Назарбаев өз сөзінде.