Жетісу облысында 8,1 млн теңге көлеміндегі күдікті аударымдар бұғатталды
ТАЛДЫҚОРҒАН. KAZINFORM - Жетісу облысы прокуратурасының үйлестіруімен және Полиция департаментімен «Антифрод» жүйесі арқылы интернет-алаяқтыққа қатысы бар тұлғалар анықталды.
Жетісу облысы прокуратурасының мәліметінше, 300-ден астам дроппердің 8,1 млн теңге көлеміндегі ақша аударымдары бұғатталды. Қазіргі уақытта жәбірленушілерге 11 млн теңгеден астам қаражат қайтарылды. Жәбірленушілерге ұрланған қаражатты қайтару үшін сотқа талап арыз беру тәртібі бойынша түсіндіру жұмыстары жүргізілді.
- Тек 2025 жылдың қаңтар айында «дропперлерге» қатысты негізсіз байыту фактісі бойынша сотқа 18 талап арыз беріліп, оның 12-сі (23,8 млн теңге сомасында) қанағаттандырылды, қалғандары қаралу сатысында, - делінген Жетісу облыстық прокуратурасының хабарламасында.
Еске салайық, осыған дейін Жетісу облысында апелляциялық алқа 61 адамның үкімін өзгерткенін жазғанбыз.
