Жетісу облысында электр дабылы іске қосылады
ТАЛДЫҚОРҒАН. KAZINFORM — Жетісу облысының төтенше жағдайлар департаменті 22 мамыр сағат 09.00-де облыстық құлақтандыру жүйесіне техникалық тексеріс жүргізу мақсатында электрдабылдар қосылатынын хабарлады.
Тексеру барысында электродабыл қондырғылары іске қосылады.
Ведомство тұрғындар мен облыс қонақтарынан сабыр сақтап, үрейге бой алдырмауды және түсіністікпен қарауды сұрайды.
— Бұл — тексеру жұмыстары аясында жүзеге асырылатын жоспарлы шара. Аталған сәтте дабыл дыбыстары естілген жағдайда, алаңдамауды өтінеміз, — делінген ТЖД хабарламасында.
Сондай-ақ департамент төтенше жағдай кезінде электродабыл іске қосылған сәттегі іс-қимыл ережесін іске салды.
- Егер дабыл сигналы тұрғын үйде жүрген сәтте берілсе:
- Радио немесе теледидарды қосып, ресми ақпаратты тыңдаңыз;
- Хабарламада берілген нұсқаулықтарға сәйкес әрекет етіңіз.
Егер дабыл кезінде далада болсаңыз:
— көшедегі дауыс ұлғайтқыштармен және жылжымалы хабарлау құралдарымен берілетін шұғыл хабарламаны тыңдаңыз;
— берілген хабарламаға сәйкес әрекет етіңіз.
Айта кетейік, Олжас Бектенов Төтенше жағдайлар министрлігіне мамыр айының соңына дейін табиғи өртке қарсы республикалық командалық штабтық оқу-жаттығу өткізуді тапсырған болатын.
