Жетісу облысында иттер мал мен үй құстарына шауып жатыр
ТАЛДЫҚОРҒАН.KAZINFORM- Көксу ауданында иттер қораға түсіп, ұсақ малдардың қарнын жарып, үй құстарын қырып тастаған. Ауыл тұрғындары шағым айтты.
Жетісу облысындағы Көксу бекетінде иттер қорадағы малдарға шауып, қарындарын ақтарып кеткен. Ауыл тұрғындарының айтуынша бұл бірінші жағдай емес. Жылда қой-ешкілерін өлтіріп, қаз-үйректерін тамақтап кетеді екен.
- Қаз бен үйрек бағып отырғаныма 1 жылға жуықтап қалды. Аудан орталығындағы базарға апарып сатып, күнелтемін. 1 қаздың құны 12-15 мың теңге. 2 ақпан күні құстарды қорадан шығарып, бақшаға жібергенмін. Біраздан соң у-шу болды да кетті. Жүгіріп шықсам ауладағы құстарымды 3 ит түгел қырып тастаған. Байқағаным ішінде неміс овчаркасы мен хаски тұқымды ит бар, - деді ауыл тұрғыны Ирина Пак.
Бір күнде қаз-үйрегі қырылып қорасы қаңырап қалған тұрғын өтеуін кімнен сұрарын білмейді. Есебі бойынша арамқатқан 28 құстың шығыны 300 мың теңгедей. Мұның алдында тура осылай көршісінің де 15 тауығын талап тастаған екен.
- Ақпан айының 3-і күні қаз бен үйрегін иттер талап, өлтірген тұрғыннан арыз түсіп, иттің иесін анықтадық. ӘҚК- нің 407- бабына сәйкес ит иесі әкімшілік жауапкершілікке тартылды. 10 АЕК көлемінде айыппұл жазылады. Иті лайка тұқымдас, - деді Көксу аудандық полиция бөлімінің учаскелік полиция инспекторы Талғат Оспанғазы.
Ал қой-ешкілерінен айырылған тұрғындар иттердің мектептен қайтқан балаларға да жүгіріп, қауып алған кездері болғанын айтады.
- Таңғы 8-9 дардың шамасында далаға шықсақ қорадағы 2 тоқтымызды ит жарып кеткен. Оның алдында қораның ішінде бұзауларды қуып жүргенін көріп қуып шыққанмын. Көшеде ит көп. Балаларға да жүгіреді. Иттеріңізді байлаңыздар деп WhatsApp чатында шулап жатады тұрғындар, - деді ауыл тұрғыны Меруерт Маратова.
Тұрғындар көшеде өріп жүретін иттерді бұрынғыдай қазір ешкім атпайтынына наразы. Мал садақа, оқудан кеш қайтатын балалары үшін алаңдайтындарын айтып отыр.
Шара қолдануды сұрайды. Бұл мәселені жауаптылар да жақсы біледі. Барлық іс-әрекеттің тек заң аясында ғана жүзеге асатынын ескерсек көшеде жүрген иттерді атуға олардың да құзіреті жоқ.
- 2024 жылы Көксу ауданы бойынша 1735 ит ауланып оның 400-і чиптеліп, кастрация жасалып, қайта босатылды. Ит ату үшін рұқсат беретін заң жоқ. Біз тек иелеріне түсіндірме жұмыстарын жүргіземіз, базаға тіркейміз, - деді Көксу аудандық ветеринарлық станциясының директоры Әділбек Алпысбаев.
Еске салайық осыған дейін Маңғыстауда жасөспірімді ит талап тастағанын жазғанбыз.
