Жетісу облысының жылыту маусымына бөлінген қаржы қалай игеріліп жатыр
Биыл Жетісу облысының жылыту маусымына 10,9 млрд теңге бөлінген. Бұл қаржыға өңірдегі жылумен жабдықтау нысандарын жөндеу және отын сатып алу шығындары кіреді, деп хабарлайды Kazinform.
Облыстық энергетика және тұрғын үй-коммуналдық шаруашылығы басқармасының есебі бойынша осы жылыту маусымында энергия кәсіпорындары үшін 365 мың тонна көмір, 10,1 мың тонна мазут қажет. Оның ішінде 83,5 мың тонна көмір мен 4,1 мың тонна мазут сатып алуға бюджеттен 1,8 млрд теңге бөлінген.
Сондай-ақ, бюджеттік ұйымдарға 10,7 млн литр дизель отынын, 4,2 мың тонна түйіршік отын және 15,4 мың тонна көмір дайындауға 5,4 млрд теңге жұмсалады. Ал жеке тұрғын үйлердің көмірге деген сұранысы 453,5 мың тонна шамасында екен. Қатты отын тапшылығын болдырмау үшін жаз айларында 236,8 мың тонна Шұбаркөл көмірі мен 216,7 мың тонна Қаражыра көмірін сатып алуға тапсырыс берілген.
Сондай-ақ, биыл облыста 5 жылумен жабдықтау нысанын қайта жаңартуға, салуға және ағымдағы жөндеуге бюджеттен 3,7 млрд.теңге бөлінген. Оның ішінде былтыр аяқ асты апатты жағдай туындап, тұрғындарды жылусыз қалдырған Талдықорған қаласындағы №4 қазандықты газбен жылытуға ауыстыруды аяқтау және шағын аудандардың жылу желілерін реконструкциялау бірінші кезекте атқарылған.
Жалпы Жетісу өңірінің қысы қысқа әрі жайлы болғанымен, аяқ асты күшейетін қытымыр аяздың тұрғындарды әбірге салатыны бар. Сол себептен де атқарушы билік тұрғындарды қажетті көмір қорын сатып алуға үндеп отыр.
Бүгінде облыстағы 38 көмір тұйығы мен қоймасында көмір саудасы қызып тұр. Бұл тұйықтар мен қоймаларда 27,5 мың тоннасы бар.
Ал көмірдің орташа бағасы 17 200-18 300 теңге аралығында. Мысалы, Шұбаркөл көмірінің әр тоннасы 18 300 теңге болса, Қаражыра көмірінің тоннасы 17 200 теңгеден сатылып жатыр. Бұған тасымал саудасы кірмейді. Дерек бойынша, қала іші мен жақын ауылдарға көлікпен тасымалдау құны 10 000 - 15 000 теңге шамасында. Ал темір жол қатынасы жоқ аудандарда көмір бағасы ұшып тұр. Атап айтқанда, Ақсу және Сарқан аудандарының тұрғындары көмірдің әр тоннасы үшін 25 000 - 26 500 теңгеге шығындалады.
Ал облыс орталығынан тысқары жатқан Панфилов ауданының тұрғындарына қажетті қатты отын Алтынкөл және Құндызды станцияларындағы темір жол тұйықтары арқылы жеткізіледі. Әр тоннасы 18 800-18 850 теңгеден сатылымда.
«Аудан тұрғындары үшін қатты отынның қажетті мөлшері 52,0 мың тонна шамасында. Бүгінде 28 561 тонна көмір әкелінді. Қажетті отын күнделікті тасымалданып жатыр. Әлеуметтік нысандарға қажет сұйық отынның 80,7% тиісті мекемелерге жеткізілді. Ал білім беру нысандары 1 479 158 литр сұйық отынмен толық қамтылды. Денсаулық сақтау нысандары 463 мың литрдің 243 мың литрін, ал мәдениет нысандары 82 076 литрдің 57 076 литр сұйық отынын қазан айының алғашқы аптасына дейін дайындап алды», - дейді Панфилов ауданы әкімдігі коммуналдық шаруашылық бөлімінің басшысы Арғын Саурықов.
