«Жетісу» өз алаңында «Шахтерді» ұтты

АСТАНА. KAZINFORM — Футболдан Қазақстан чемпионатының 5-турында соңғы матчта «Жетісу» (Талдықорған) өз алаңында Қарағандының «Шахтер» командасын қабылдады.

Талдықорғандықтар ойын тізгінін бірден қолына алып, басымдыққа ие болды.

Бірінші таймның соңғы минутында команда капитаны Серікжан Мужиков 11 метрлік айып добын дәл орындады — 1:0.

Екінші кезеңде қарағандылықтар есепті өзгертуге тырысқанымен, одан ештеңе шыққан жоқ.

Бес турдан кейін 7 ұпай жинаған «Жетісу» 8-орынға көтерілді.

Небәрі үш ұпайы бар «Шахтер» 12-сатыда, қауіпті аймақта қалды.

Алтыншы тур ойындары 27-28 сәуірде өтеді.

Еске сала кетейік, бұдан бұрын футболдан ел чемпионатында «Қайратты» ұтқан «Ақтөбенің» көш басына шыққанын жазған болатынбыз. 

Бүгін «Астана» мен «Тобыл» командалары тең тарқасты.