Жетісуда ауыл тұрғындары мәдениет нысанын заңдастыра алмай жүр
ТАЛДЫҚОРҒАН. KAZINFORM - Ақсу ауданындағы Кеңғарын ауылының тұрғындары өз қаржыларына мәдениет ошағын тұрғызған. Ал аудан әкімі құрылыс талапқа сай емес деп заңдастырмай отыр.
Ауыл халқы 10 млн теңгеге жуық қаржы жинап, жаңа нысанның іргетасын қалап, шатырын жауып алған. Бітпей тұрғаны ішкі-сыртқы сылағы мен ұсақ-түйек жұмыстар. Көпшілік баратын бір мәдени орын болса деген ниетпен салынған ғимаратты әкімдіктегілер заңсыз деп отыр. Ал ауыл ақсақалдары құрылысқа бұрынғы әкімнің рұқсат бергенін айтады.
- 2020 жылы 2 адам болып ауданға барғанбыз. Сол кездегі әкім «мыналарыңыз жақсы, ауылдарыңыз ұйымшыл екен, бастамаларыңызға қуаныштымыз» деп шығарып салған. Содан кейін орынбасары Амандос мырза келіп, клубтарыңызға құрылыс ретінде қағаздарын жасаймыз, 5 штат беріледі деген. Ол да жасалған жоқ, - деді ауыл тұрғыны Жақсыжол Төлеулин.
Ал ауданының қазіргі әкімі Кеңғарындағы мәдени ошақтың талапқа сай еместігін алға тартты. Ескісін сүріп, жаңасын салуға кімнің рұқсат бергінінен де бейхабар.
- Ол кісілер бұрынғы клубтың орнына салыпты. Көпшілік баратын жер. Құрылыс салынған соң норма сақталу керек. Жұмыс жоспары болу керек, ол экспертизадан өту керек. Рұқсат берілу керек. Содан кейін пайдаланады. Әр адам өзінше салып мынаны үкіметке ал деген қалай болады? Ертең ол құлап қалса кім жауапкершілікке алады? Рәсімдей алмаймыз. Құрылыс нормасы сақталу керек,- деді Ақсу ауданының әкімі Берік Тынышбаев.
Тұрғындар штатта бар бірақ ауылда ешқандай іс-шара өткізбейтін ауылдың мәдениет қызметкеріне де наразы. Айтуларынша, ай сайын жалақы алып отырған қызметкер мұғалімдер ұйымдастырған концерттерге келіп, фотоға түсіп, жоғарыдағыларға есеп беретін көрінеді.
- Бізде штаттағы Бейбіт деген кісі балалармен келіп суретке түседі екен. Басында мән бермейтінбіз не үшін суретке түседі деп. Ол кісі ауданға Қаракөзде де, Кеңғарында да концерт қойдым деп фотоны отчет ретінде жіберген, инстаграмда да бар екен. Ешқандай да концерт қойылған жоқ, ұйымдастырылған жоқ. Ата-аналар да куә, сұраңыздар. Қай баласымен, қай мерекеде концерт ұйымдастырыпты ол кісі? 2008-ден бері концерт ұйымдастырылмаған. Оның алдында да, кейін де ұйымдастырылмады,- деді Кеңғарын ауылының тұрғыны Жанар Қасенова.
Ауыл тұрғындарының көңілінен шықпаған жауапты маман 40 жылға жуық мәдениетке қызмет еткен азамат екен. Ол ауыл тұрғындарымен тіл табыса алмағандықтан Кеңғарын ауылындағы жұмысын атқармағанын мойындады.
- Басында театр ұйымдастырғанмын 1-2 күндей сонда фотаға түскенім бар. Одан басқа жоқ. Наурыз тойы, Жаңа жыл сияқты ауқымды халық жиналатын кезде 2 ауылға бірдей істедім. Бір жылы мектеп директоры жаңа музыкалық аппаратура алып келдім. Ел сізді көргісі келмейді енді келмеңіз деді. Онда маған ренжімеңдер әйтеуір шаралар өтпей қалмасын дедім де, содан бері ол жаққа барған жоқпын. Қаракөзде іс-шараларымның бәрін өткізіп жатырмын. Молықбай атындағы аудандық мәдениет үйіндегілер бәрі біледі, келіп айтқанмын. Әлеуметтік желіде бәрі тұр бостан-босқа ақша төлемейді ғой,- деді Қаракөз ауылдық округының мәдениет қызметкері Бейбіт Танысбек.
Ауыл ақсақалдары жаңа нысанның құжаты заңдастырылмаса елдің еңбегі желге ұша ма деп алаңдайды. Ал аудан әкімі мәдениетке жауапты маманның жұмысын тексеретінін жеткізді.
Еске салайық осыған дейін Жетісу өңірінде ауыл тұрғындары қаржы жинап, көпір салғанын жазғанбыз.
