Жезқазғанда заманауи дене шынықтыру-сауықтыру кешені ашылды

АСТАНА. KAZINFORM -  Бес блок және спортпен шұғылдануға арналған 8 мыңға жуық шаршы метр аумақ. Бүгін Жезқазғанда «Жігер» заманауи дене шынықтыру-сауықтыру кешенінің ашылуы өтті, деп хабарлайды Kazinform агенттігінің тілшісі.

Жезқазғанда заманауи дене шынықтыру-сауықтыру кешені ашылды
Фото: «Қазақмыс Корпорациясы» ЖШС PR департаменті

«Қазақмыс» компаниясының әлеуметтік жауапкершілігінің арқасында енді Жезқазғанның жас тұрғындары спорттық белестерді бағындыра алады. Жаңа көпфункционалды спорт кешені қала жастарының сүйікті орнына айналары хақ дейді Ұлытау облысының әкімі Дастан Рыспеков. Өзінің құттықтау сөзінде өңір басшысы барлық жезқазғандықтардың атынан шексіз қуанышын білдірді.

- Бүгін сіздер «Қазақмыс» корпорациясының қолдауымен салынған «Жігер» спорт кешенінің ашылуына куә болып отырсыздар. Бұл кешенде спортпен шұғылдануға, сондай-ақ халықаралық және республикалық жарыстар өткізуге қажеттінің барлығы қарастырылған. Кешеннің ашылуы халық арасында бұқаралық спортты дәріптеуге және балалар мен жасөспірімдерді дене шынықтырумен және спортпен шұғылдануға барынша көбірек тартуға мүмкіндік беретініне сенімдімін. Осы кешеннің тәрбиеленушілері таяу болашақта спорттық белестерді бағындырып, әлемдік ареналарда көкбайрағымызды желбіретіп, біздің облысымызды және еліміздің атағын шығарады деп сенеміз, - деді облыс әкімі Дастан Рыспеков.

Жезқазғанда заманауи дене шынықтыру-сауықтыру кешені ашылды
Фото: «Қазақмыс Корпорациясы» ЖШС PR департаменті

Құрылыс жобасы Bank RBK қолдауымен «Қазақмыс корпорациясы» ЖШС мен Ұлытау облысының әкімдігі арасындағы меморандумды орындау шеңберінде іске асырылды. Спорт нысанын салуға 8,5 млрд теңге бөлінді.

- Қаңтар айының басында Сәтпаевта «Ақбота» үлкен балабақшасы ашылды, одан кейін еліміздегі ең ірі шахмат академиясы есігін ашты, бүгін міне «Жiгер» ДСК ашылды. Алда бізді әлі де көптеген жаңалықтар күтуде. Жыл соңына дейін тағы 5-6 нысанның құрылысын аяқтап үлгереміз. Баршамызға үлкен жеңістер тілеймін. Біздің облысымыз өркендеп, дами берсін, ал өңіріміздің тұрғындары үлкен жеңістерге қол жеткізіп, облысымыздың даңқын асқақтата берсін, - деп атап өтті «Қазақмыс Корпорациясы» ЖШС басқарма төрағасы Нұрахмет Нуриев.

Кешеннің жалпы ауданы 7 816 м². Ғимараттың үш қабатында бес функционалды блок орналасқан: үстел теннисі, бокс, гимнастика залдары, жаттығу залы және бассейн. Соңғысы Жезқазған тұрғындарын ерекше қуантты деуге болады. Себебі қалада осыған дейін бассейн болмаған. Жаңа жүзу бассейнінің ұзындығы 25 метрді құрайды және ол барлық стандарттарға сәйкес жабдықталған. Оған кешеннің ашылуына арнайы қонақ ретінде келген жүзу спортынан Олимпиада чемпионы Дмитрий Баландин оң бағасын берді.

- Ұлытау облысының басшылығы мен Қазақмыс корпорациясына осы спорт кешенін ашқаны үшін алғыс айтамын. Мен өзім қазір ұлттық құраманың жаттықтырушысы болып жұмыс істеймін және біздің командада еліміздің барлық облыстарынан келген спортышлар бар. Алайда, өкінішке орай, Ұлытау облысынан әзірге өкілдер жоқ. Бірақ болашақта сіздер ұлттық құрамаға кіріп, Қазақстанды халықаралық аренада танытасыздар деп үміттенемін. Мен әрбір баланың талантты екеніне сенемін, олардың әлеуетін ашу үшін жағдай жасау өте маңызды, - деп өз әсерімен бөлісті Олимпиада чемпионы Дмитрий Баландин.

Жезқазғанда заманауи дене шынықтыру-сауықтыру кешені ашылды
Фото: «Қазақмыс Корпорациясы» ЖШС PR департаменті

Кешенде командалық спорт түрлеріне арналған ауданы 1200 м² құрайтын әмбебап спорт залы қарастырылған, ол электронды табломен, баскетбол сақиналарымен, спорттық мүкәммалмен және 320 орындық трибуналармен жабдықталған. Ауданы 350 м² көркем және спорттық гимнастика залында айналар орнатылып, спорттық төсеніштермен, арқандармен және гимнастикалық снарядтармен жабдықталған. Спорт кешенінің екінші қабатында әлемдік стандарттарға сәйкес келетін үстел теннисіне арналған зал және кәсіби рингі, тұоып, швед қабырғалары және дайындыққа арналған тренажерлары бар бокс залы орналасқан. Бұл жерде Олимпиада чемпионы Ермахан Ыбрайымов жас спортшыларға шағын шеберлік сабағын өткізді.

- Ұлытау облысында спортпен айналысуға тамаша мүмкіндік туды. Өңір басшылығы мен «Қазақмыс» корпорациясы жезқазғандықтарға осы мүмкіндікті сыйлағанына өте қуаныштымын. Мен таяу болашақта әлемдік аренада Ұлытау облысынан шыққан боксшыларын көретінімізге кәміл сенімдімін, - деді Олимпиада чемпионы Ермахан Ыбрайымов.

Жезқазғанда заманауи дене шынықтыру-сауықтыру кешені ашылды
Фото: «Қазақмыс Корпорациясы» ЖШС PR департаменті

Жаңа спорт нысанының құрылысымен «Tansu Construction» компаниясы айналысты. Жаңа ғимарат аз уақытта бой көтерді.

«Жігер» ДСК Қазақстанның ең заманауи спорт кешендерінің бірі болып табылады. «Қазақмыс» корпорациясы нысанның ашылуы Ұлытау облысының жан-жақты дамуына, оның тұрғындарының өмір сүру сапасын арттыруға, жастар мен аға буынның спортпен шұғылдануға және денсаулығын нығайтуға қуатты серпін беретініне сенімді.

Соңғы жаңалықтар