ЖИ EURO-2024 пен Америка кубогындағы құрамалардың жеңіске жету мүмкіндігін бағалады
АСТАНА. KAZINFORM – Германия мен АҚШ-та құрлықтық доп додалары жалғасып жатыр. EURO-2024 және Америка кубогының жартылай финалдық кездесулері 9-10 шілдеде өтеді. Жасанды интеллект қос турнирдегі жеңіске жету ықтималдығы жоғары құрамаларды атады.
Еуропа чемпионатында Испания мен Франция құрамалары бірінші жартылай финалда кездессе, бір күннен кейін Нидерландпен Англия екінші финалисті анықтайды.
Opta-ның есептеуінше, «қызғалдақ елі» құрамасының жеңіске жету ықтималдығы 16,23% деп есептеп отыр. Бұл – ең төмен көрсеткіш. Англияның жеңіске жету мүмкіндігін 22,98% деп бағалады. Фавориттер – Испания (30,3%) мен Франция (30,49%).
Америка кубогына келетін болсақ, онда футбол жанкүйерлерін Аргентина – Канада және Уругвай – Колумбия арасындағы жартылай финалдық кездесулер күтіп тұр.
Канада Солтүстік Американың жалғыз өкілі және оның жеңіске жету мүмкіндігі 3,86% ғана деп бағаланды. Колумбия (16,73%) мен Уругвайда (27,6%) турнирді жеңіп алу мүмкіндігі «үйеңкі жапырақ елінің» құрамасына қарағанда әлдеқайда көп.
Қазіргі әлем чемпионы Аргентина Америка кубогы басталмай тұрып-ақ аталған турнирдің басты фавориті саналған. Лионель Месси бастаған құраманың жеңіске жету мүмкіндігі – 51,81%.
Еске сала кетейік, Колумбия мен Аргентина құрамаларының Америка кубогының ширек финалына шыққанын жазған едік.
