Жібек Құламбаева Чехиядағы жарыстың финалына шықты

АСТАНА. ҚазАқпарат – Қазақстандық Жібек Құламбаева жұптық сында Чехияның Оломоуц қаласында өтіп жатқан ITF турнирінің финалына шықты, деп хабарлайды ҚазАқпарат тілшісі.

Жарыстың екінші ракеткалары болып тіркелген Ж.Құламбаева мен латвиялық Дарья Семенистая жартылай финалда чехиялықтар Дениса Дениса – Каролина Кубановамен шеберлік байқасты.

Бір сағат 18 минутқа созылған матчта қазақстандық-латвиялық жұп 6:4, 6:3 есебімен жеңіске жетті.

Ж.Құламбаева – Д.Семенистая финалда чехиялықтар Магдалена Смекалова – Тереза Валентовамен бас жүлдені сарапқа салады. Олар жартылай финалда доданың 1-ракеткалары, грекиялық Сапфо Сакеллариди – нидерландылық Лекси Стивенсті қапы қалдырды – 7:5, 6:2.

Еске сала кетейік, бұдан бұрын Александр Недовесовтің Швециядағы турнирдің финалына өткенін жазған болатынбыз.