Жібек Құламбаева Шымкент турнирінің ширек финалына шықты

НҰР-СҰЛТАН. ҚазАқпарат – Қазақстандық Жібек Құламбаева Шымкентте ITF сериясы бойынша өтіп жатқан турнирдің ширек финалына шықты, деп хабарлайды ҚазАқпарат тілшісі.

Қазақстан теннис федерациясы мәлім еткеніндей, әлемнің 489-ракеткасы Ж.Құламбаева жекелей сында екінші айналымда дүниежүзілік рейтингте 1142-орында тұрған ресейлік Мария Крупенинамен кездесті.

Жарыстың бірінші ракеткасы болып тіркелген қазақстандық теннисші 6:2, 6:1 есебімен жеңіске жетті.

Ж.Құламбаева жұптық сында осы жарыстың жартылай финалына да өтті. Ол ресейлік Анастасич Сухотинамен бірге ширек финалда ресейлік Елизавета Шебекина – белоруссиялық Ксения Ерштан 6:4, 6:2 есебімен басым түсті.

Тағы бір қазақстандық Бейбіт Жукаев Тунисте өтіп жатқан ITF M15 жарысының ширек финалына шықты. Ол екінші айналымда франциялық Мартин Брейсахты жолдан тайдырды – 6:4, 4:6, 6:3.

Еске сала кетейік, бұдан бұрын Юлия Путинцеваның Ыстанбұл турнирінің ширек финалына шыққанын, Елена Рыбакинаның тартысты матчта әлемнің үшінші ракеткасына жол бергенін жазған болатынбыз.