Жыл басынан 3 тоннадан астам есірткі тәркіленді

АСТАНА. KAZINFORM – Мемлекет басшысының тапсырмасы бойынша әзірленген нашақорлыққа және есірткі бизнесіне қарсы күрес жөніндегі кешенді жоспар шеңберінде елде есірткі қылмысына қарсы белсенді күрес жалғасып келеді. 

2025 жылғы наурыздан бастап Әкімшілік құқық бұзушылық туралы кодекстің 440-1-бабы күшіне енді, ол жеке үй-жайларда есірткіні медициналық мақсаттан тыс пайдаланғаны үшін жауапкершілікті көздейді.

Мұндай бұзушылық үшін айыппұл 40-тан 80 АЕК-ке дейін, ал қайталап бұзған жағдайда 20 тәулікке дейін қамауға алуға болады.

ІІМ деректері бойынша жыл басынан бері заңсыз айналымнан 3 тоннадан астам есірткі, оның ішінде 251 кг синтетика тәркіленді. Бұдан басқа, 69 нарколаборатория, оның ішінде 5 синтетикалық есірткі өндірісі жойылды. Есірткі бизнесінің қаржылық ағынына қарсы күресте шамамен 850 млн теңгеге 8 мыңға жуық шот бұғатталды.

Қазақстанда цифрлық саладағы құқық бұзушылықтарға қарсы күрес аясында киберқылмысқа қарсы іс-қимыл департаменті өз жұмысын бастады.

Негізгі жетістіктердің бірі 66 млн алаяқтық қоңыраулардың алдын алу болды. Бұл 2024 жылмен салыстырғанда 25%-ға артық, 14 мың заңсыз сайт анықталып, бұғатталды. Киберқылмыстың ашылуы 2024 жылғы 28,4%-дан 38,9%-ға дейін өсті. 

Айта кетелік бейнебақылау камераларының арқасында 1,2 мыңнан астам қылмыс анықталған еді.