Жыл басынан бері 52 адам өрттен мерт болды – ТЖМ

АСТАНА. KAZINFORM — Жыл басынан бері елімізде 1 мыңнан астам өрт шығу фактісі тіркелді. Бұл туралы Төтенше жағдайлар министрлігі өртке қарсы қызмет комитеті төрағасының міндетін атқарушы Ерлан Төрегелдиев мәлім етті.

— Министрлік өртке қарсы белсенді профилактикалық жұмысты жалғастырып жатыр, әсіресе қыс мезгілінде, яғни жылу маусымында өрт қаупі арта түседі. Өрттің негізгі себептері - пештің ақаулығы, жылыту құрылғыларын дұрыс пайдаланбау және электр желілерінің шамадан тыс жүктелуі. 2025 жыл басталғалы ел аумағында тұрғын үй секторында 1 138 өрт шықты, тілсіз жаудан 313 адам құтқарылды. Қайғылы апат та болды, 52 адам өрттен қаза болды, оның ішінде 6 бала көз жұмды, — деді Ерлан Төрегелдиев орталық коммуникациялар қызметі алаңында өткен баспасөз мәслихатында. 

Одан бөлек, спикердің айтуынша, өрттен 50 адам түрлі жарақат алған, оның ішінде 8 бала бар. 

— 22 қаңтарда СҚО Шал ақын ауданы Ступенко ауылында тұрғын үйден өрт шығып әкесі мен 4 бала қаза тапты. Өрт электр құралдарының қысқа тұйықталуынан болды. 2 қаңтарда Жетісу облысының Текелі қаласында тұрғын үйде пешті дұрыс орнатпау себебінен өрт шығып, 3 адам қаза тапты, — дейді ол.

Айта кетсек, бірер күн бұрын Талғарда дөңгелек зауытынан шыққан өрт шыққан еді. Оқиға орнына Төтенше жағдайлар министрі Шыңғыс Әрінов барды.