Жыл басынан бері елімізде адам саудасына қатысты 75 іс тіркелген
АСТАНА. KAZINFORM — ҚР ІІМ Ұйымдасқан қылмысқа қарсы күрес департаментінің жедел уәкілі Әміржан Ағелеуов еліміздегі адам саудалау қылмысына қатысты соңғы статистикалық деректерді мәлім етті.
Ішкі істер министрлігінің дерегіне сәйкес, 2024 жылы адамды еркінен тыс бас бостандығын шектеуге қатысты барлық бап бойынша 207 факт анықталған. Ал былтыр 203 оқиға болса, биыл 4 айда 75 жағдай тіркелген. Оның ішінде тікелей 128-бап («Адам саудасы») бойынша 4 іс қозғалған.
– ҚР Қылмыстық кодексінің 128-бабы (Адам саудасы) бойынша 2024 жылы – 14, 2025 жылы – 12 факт тіркелсе, биылғы алғашқы 4 айда – 4 дерек анықталды. Бұл латентті қылмыс болғандықтан, тергеу іс-әрекеттерінде дәлелдеу базасына қатысты қиындықтар жиі туындайды. Биыл бұл бағытта жоғары динамика жоқ. Бірақ жеңгетайлық қылмыстар мен заңсыз әрекет жасалатын орындарды ұйымдастыру және жүргізу фактілері жиі кездеседі, – дейді Әміржан Ағелеуов.
Елімізде адам саудасына қатысты бірнеше бап көзделген. Олар:
· 116-бап – Адамның тіндерін немесе ағзаларын алып қоюға мәжбүрлеу
· 125-бап 3-бөлік 2-тармақ – Адам ұрлау
· 126-бап 3-бөлік 2-тармақ – Бас бостандығынан заңсыз айыру
· 128-бап – Адам саудасы
· 134-бап – Кәмелетке толмаған адамды жезөкшелікпен айналысуға, сексуалдық сипаттағы өзге де қызметтерді көрсетуге тарту
· 135-бап – Кәмелетке толмағандар саудасы
· 308-бап – Жезөкшелікпен айналысуға тарту
· 309-бап – Притон ұйымдастыру немесе ұстау және жеңгетайлық
Айта кетейік, бұған дейін өткен жылы шет елдерде 40-тан астам қазақстандықтың құлдықтан босатылғаны туралы жазған едік.
