Жыл басынан бері Қазақстан Өзбекстанға 473 млн доллардың тауарын экспорттаған

ТАШКЕНТ. KAZINFORM – Қаңтар-ақпан айларының қорытындысы бойынша Қазақстан Өзбекстанның негізгі сауда серіктестерінің үштігінде қалды, деп хабарлайды Kazinform агенттігінің меншікті тілшісі.

Өзбекстанның Ұлттық статистика комитетінің ақпаратына сай, қаңтар-ақпан аралығында елдің сыртқы сауда айналымы 10,8 млрд долларға жетіп, былтырғы кезеңмен салыстырғанда 9,9%-ға өсті. Бүгінгі таңда көршілес мемлекет әлемнің 162 елімен сауда-саттық жасайды.

Елдің негізгі сауда серіктестері көшін Қытай бастап тұр. Екі мемлекет арасындағы тауар айналымы 2 млрд доллардан (жалпы көлемнің 19,2%) асты.

Одан кейінгі орында сауда-саттықтың 14,9% үлесі тиесілі Ресей тұр. Бұл елмен арадағы импорт-экспорт көлемі 1,6 млрд доллардан артық.

Сонымен қатар, көшбасшылардың үштігін Қазақстан түйіндейді. Біздің ел мен Өзбекстан арасындағы тауар айналымы 659,9 млн доллар (6,5%) болды. Бұл өткен жылдың сәйкес кезеңімен салыстырғанда 78,8 млн долларға көп.

Қамтылып отырған кезеңде Өзбекстан Қазақстанға 186,1 млн доллардың тауарын экспорттап, 473,8 млн доллардан астам сомаға тауар импорттаған.

Еске салайық, ресми Астана мен Ташкент өзара тауар айналымын 10 млрд долларға жеткізуге мүдделі. Аталған көрсеткішке қол жеткізу үшін Қазақстан мен Өзбекстан арасында қосымша 4 сауда дәлізі ашылуы мүмкін.

Қоса кетсек, кейінгі 5 айда Қазақстан Өзбекстанға 2 млн тонна астық экспорттады.