Жылқы етін жеп көргіміз келеді – көшпенділер ойындарына келген нидерландтық фотожурналистер
АСТАНА. KAZINFORM – Джонна Элизавет Райтер пен Эрик Уолф – V Дүниежүзілік көшпенділер ойындарына Нидерланд елінен арнайы келген фототілшілер. Ойынды тамашалап жүрген қонақтарды әңгімеге тартқан едік.
Шетелдік меймандар елімізге алғаш келіпті. Олар Қазақстанда бір аптадай болуды жоспарлап отыр.
«Қазақстанға алғаш келіп отырмыз, алдымен көзге түскені халық – қонақжай. Бүгін келдік, әлі ойындарды тамашалап үлгермедік, Қазақстан туралы көбірек білгіміз келеді. Менің жеке сайтым бар, көшпенділер ойындарының фотоларын сол жерде жариялайтын боламын», - деді Джонна Элизавет Райтер.
Еуропалық қонақтарға көшпенділер ойындарындағы атмосфера ұнап жатыр, әсіресе музыка. Сондай-ақ, әзірге қазақтың ұлттық тағамдарының дәмін татпағанын айтты.
«Жылқы етін жеп көргіміз келеді, себебі біздің елде жылқы етінен жасалатын тағам жоқ», - дейді ол.
Одан бөлек, Нидерландтан жеткен меймандар көкпар, көкбөрі және садақ ату ойындарын тамашалайтынын айтты.
Еске сала кетсек, Астана өтіп жатқан V Дүниежүзілік көшпенділер ойындарына қатысушы елдер 10 спорт түрінен сынға түсті.
Айта кетейік, 9 қыркүйектің қорытындысы бойынша Қазақстан медальдар кестесінде көш бастады. Кеше біздің спортшылар қоржынға 14 алтын, 3 күміс және 8 қола медаль салды.
