Жоғары деңгейде өңделген өнім шығаратын кластерге кіретін жобалар қандай

АСТАНА. KAZINFORM — Жоғары деңгейде өңделген өнім шығаратын кластер құруға бағытталған 17 ірі жобаны іске асыру нәтижесінде 24 мыңнан астам жаңа жұмыс орны құрылады. Бұл жайында Мәжіліс депутаттарының сауалына Премьер-Министр Олжас Бектеновтің жауабында айтылған.

— Мемлекет басшысының 2023 жылғы 1 қыркүйектегі «Әділетті Қазақстанның экономикалық бағдары» атты Қазақстан халқына Жолдауында Үкіметке басым бағыттарда, оның ішінде металдарды терең өңдеу, мұнай, газ және көмір химиясы, машина жасау, автокомпоненттер мен тыңайтқыштар шығару, туризм саласы және тағы басқа жоғары деңгейде өңделген өнім шығаратын кластер құруға бағытталған кемінде 15 ірі жобаның тізбесін бекіту міндеті қойылды, — деп атап өтеді Премьер-Министр жауабында.

Олжас Бектеновтің дерегінше, ол үшін Үкімет мынадай жобалардың тізбесін жасады:

1) металлургиялық кластер (Павлодар облысы), «Mineral Product International» ЖШС, инвестиция көлемі — 228,5 млн доллар, 526 жұмыс орнын құру, іске қосу мерзімі — 2026 жыл;

2) ыстықтай брикеттелген темір өндіру зауыты (Қостанай облысы), «ССКӨБ» АҚ (ERG), инвестиция көлемі — 1 млрд доллар, 500 жұмыс орнын құру, іске қосу мерзімі — 2028 жыл;

3) Qarmet зауытын жаңғырту (Қарағанды облысы), «Qazaqstan Steel Group» ЖШС, инвестиция көлемі — 3,5 млрд доллар, аяқтау мерзімі — 2028 жыл;

4) мыс балқыту зауыты (Абай облысы), «KAZ Minerals Smelting»/NFC» ЖШС, инвестиция көлемі — 1,3 млрд доллар, 1083 жұмыс орнын құру, іске қосу мерзімі — 2028 жыл;

5) Құрамында алтыны бар жоғары көміртекті сульфидті концентраттарды қайта өңдейтін «Ертіс гидрометаллургиялық комбинаты», Solidcore Resources, инвестиция көлемі — 978 млн доллар, құрылыс барысында 1 мыңнан аса жұмыс орны, сондай-ақ 500 тұрақты жұмыс орны құрылады, іске қосу мерзімі — 2028 жыл;

6) бутадиен және оның туындыларын шығаратын зауыт (Атырау облысы), «Бутадиен» ЖШС, инвестиция көлемі — 900 млн доллар, 750 жұмыс орнын құру, іске қосу мерзімі — 2028 жыл;

7) полиэтилентерефталат өндіретін зауыт (Атырау облысы), «KMG PetroChem» ЖШС, инвестиция көлемі — 1,5 млрд доллар, 800 жұмыс орнын құру, іске қосу мерзімі — 2029 жыл;

8) Интеграцияланған газ-химия кешені — газ сепарациялық кешеннің құрылысы бойынша жобаны іске асырумен екінші кезең (полиэтилен) (Атырау облысы), «Силлено» ЖШС/«KMG PetroChem» ЖШС, инвестиция көлемі — 9,7 млрд доллар, 938 жұмыс орнын құру, іске қосу мерзімі — 2029 жыл;

9) Шымкент МӨЗ-нің 2-ші кезегін салу (Шымкент қ.), «ҚазМұнайГаз» ҰК» АҚ, инвестиция көлемі — 5 млрд доллар, 1200 жұмыс орнын құру, іске қосу мерзімі — 2030 жыл;

10) аммиак және карбамид өндіретін зауыт (Маңғыстау облысы), «КазАзот Prime» ЖШС, инвестиция көлемі — 1,5 млрд доллар, 700 жұмыс орнын құру, іске қосу мерзімі — 2028 жыл;

11) калий тұздарын өндіретін байыту-өндірістік кешені (Батыс Қазақстан облысы), «Qazaq Kalium Ltd» ЖК, инвестициялар көлемі: 1-кезең — 1,25 млрд доллар, 2-кезең — 1 млрд доллар, 3-кезең — 1 млрд доллар, 4900 жұмыс орнын құру, бірінші кезеңді іске қосу мерзімі — 2027 жыл, екінші кезең — 2030 жыл, үшінші кезең — 2035 жыл;

12) KIA автомобильдерін шығаратын зауыт (Қостанай облысы), «KIA Qazaqstan» ЖШС, инвестиция көлемі — 191,5 млн доллар, 1500 жұмыс орнын құру, іске қосу мерзімі — 2025 жыл;

13) Қытай автомобильдерінің шығаратын мультибрендті зауыт (Алматы қ.), «Astana Motors Manufacturing Kazakhstan» ЖШС, инвестиция көлемі — 387 млн доллар, 3600 жұмыс орнын құру, іске қосу мерзімі — 2025 жыл;

14) көпфункционалды туристік аудан (Астана қ.), «Ellington Group Kaz Ltd.», инвестиция көлемі — 412 млн доллар, 2000 жұмыс орнын құру, іске қосу мерзімі — 2026 жыл;

15) Ақтау қ. «жылы жағажайды» кешенді дамыту (Маңғыстау облысы), Bazis-A, BI Group, FTG Group (Sembol) Tethys Aktau, инвестиция көлемі — 292 млн доллар, 5000 жұмыс орнын құру, іске қосу мерзімі — 2026 жыл;

16) бидай мен бұршақты терең өңдейтін интеграцияланған агроөнеркәсіптік кешен (Астана қ.), Tiryaki Agro (Түркия)/Hassad Food (Қатар), инвестиция көлемі — 400 млн доллар, 400 жұмыс орнын құру, іске қосу мерзімі — 2026 жыл;

17) бидай дәнін терең өңдеу зауыты (Қостанай облысы), «Qostanai Grain Industry» ЖШС, инвестиция көлемі — 149 млн доллар 650 жұмыс орнын құру, іске қосу мерзімі — 2027 жыл.

— Іріктеу кезінде орташа және жоғары деңгейде өңделген өнім шығару критерийлері, экспорт пен импортты алмастыруға бағдарлану, нарықтағы сұраныс, стратегиялық маңыздылығы (мультипликативті әсер) ескерілді. Жобалардың жалпы құны 14 трлн теңгеден асады, қаржыландыру көздері — жеке инвестициялар және қарыз қаражаты. Бұл ретте республикалық бюджеттен қаржыландыру жобалардың әзірлігіне қарай тек қажетті инженерлік-коммуникациялық инфрақұрылымды жеткізу үшін ғана қаралатын болады. Бұл жобалар толық қуатына шыққан кезде 24 мыңнан астам жұмыс орны құрылып, экспорт 6 трлн теңгеден астам сомаға ұлғаяды, импортты алмастыру жыл сайын 1,5 трлн теңгеден асады. Жұмыстардың барысына тиісті бақылауды қамтамасыз ету үшін әрбір жоба бойынша іске асырудың егжей-тегжейлі жоспарлары бекітілді. Олардың мониторингі Инвестициялық штаб аясында жүзеге асырылуда, — деді Үкімет басшысы.

Еске салсақ, бұған дейін Үкімет Жезқазғанның жылу желілерін жаңғыртуға резервтен 1,5 млрд теңге қаржы бөлгені туралы жаздық.