Жошы хан. Ұлы Ұлыстың билеушісі: Майя Бекбаеваның альбом-кітабы жарық көрді

АСТАНА. KAZINFORM — Алматыда Шыңғыс ханның тұңғыш ұлы Жошы ханның өмірі мен мұрасына арналған «Жошы хан. Ұлы Ұлыстың билеушісі» атты кітап-альбомның тұсаукесері өтті.

Жаңа кітаптың авторы танымал журналист, тарихи деректі фильмдердің авторы Майя Бекбаева. Туынды қазақ, орыс және ағылшын тілдерінде жазылған. Онда Жошы ханның өмірінің ең маңызды сәттері, мәдени және саяси мұрасы, сондай-ақ, қазақ мемлекетінің қалыптасуындағы рөлі жан-жақты баяндалған. 

— Кітап Жошы хан туралы деректі фильмнің шығуы қарсаңында жарық көрді. Біз бұл фильмді Президент телерадиокешенімен бірлесіп түсірдік. Кітапта жазылған оқиғалар деректі фильмде кездеспейді. Бұл басылымда Алтын орданың құрылу тарихына толық тоқталамыз. Бұрын сонды айтылмаған тың тарихи фактілер келтірілген. Сондай, ақ, Шағатай, Үгедей хан тұлғаларының бейнесін ашуға тырыстық, — деп атап өтті туынды авторы Майя Бекбаева.

Айта кетейік, жақында Жібек жолы арнасында Майя Бекбаеваның «Жошы хан. Ұлы Ұлыстың тарихы» атты деректі фильмі көрерменге жол тартады.

Еске салсақ, бұдан бұрын белгілі қазақстандық журналист, продюсер және жүзден астам деректі фильмнің авторы Майя Бекбаева ТҮРКСОЙ алтын медалімен марапатталған еді.